Алмати аэропортида гаровга олинган аёлни қутқарган эркакнинг исми маълум бўлди.
Azattyq Rýhy нашрининг хабар беришича, Алмати аэропортида гаровга олинган аёлни қутқарган шахснинг исми маълум бўлди.
Ҳодиса 7 март куни соат 11:45 да Алмати аэропортининг ички рейслар терминалида, парвоздан олдинги текширув ҳудудида содир бўлган. Алмати халқаро аэропортининг авиация хавфсизлиги хизмати ходимлари бир шахсдан ҳужжатларни тақдим этишни сўраган. У эса назоратчи ходиманинг сочидан ушлаб, пичоқ билан таҳдид қилган. Бу шахс 7 дақиқа ичида у қуролсизлантирилди. Жиноятчи 67 ёшли Алмати шаҳри фуқароси экани аниқланди. Ҳозирда мазкур ҳолат бўйича жиноят иши қўзғатилиб, тергов олиб борилмоқда.
Айни пайтда, ижтимоий тармоқларда тарқалган, бу ҳодисага алоқадор видеоларда бир эркакнинг гаровга олинган аёлнинг ёнига аста-секин яқинлашаётгани кўринади. У жиноятчи билан суҳбатлаша бошлайди ва гаровга олинган аёл ўрнига ўзини олишни таклиф қилади. Жиноятчи бу таклифни қабул қилади. Қаҳрамон фурсатдан фойдаланган ҳолда, жиноятчининг қўлидан пичоқни тортиб олади.
24KZ маълумотларига кўра, бу жасур шахс 1973 йилда туғилган Абдраим Муса Сайранбайўғли бўлиб, у аэропортда яқинларини кузатишга чиққан пайтида шу ҳодисанинг гувоҳи бўлган.
Қозоғистон президенти Қосим-Жомарт Тўқаев жиноятчини қуролсизлантирган эркакни мукофотлашни буюрди. Президент унинг жасурлиги ва эпчиллигини таъкидлаб, давлат мукофотига тавсия қилишни топширди.
Абдуллоҳ Саййид
