Самарқанд вилоятида ўтказилган тезкор тадбирда қурилиш учун мўлжалланган мармар тошлар орасига яширилган катта миқдордаги наркотик моддалар фош этилди.
“Хавфсиз ва соғлом юрт” тадбирлари доирасида Давлат хавфсизлик хизмати, Ички ишлар ҳамда Божхона органлари ҳамкорлигида ўтказилган тезкор тадбирда тўрт нафар шахс қўлга олинди. Улар орасида 1992 йилда туғилган хорижий давлат фуқароси ҳамда Самарқанд вилоятида яшовчи 1981 ва 1995 йилларда туғилган уч нафар Ўзбекистон фуқароси бор.
Терговга кўра, чет эллик фуқаро гиёҳвандлик воситаларини мармар тошлар орасига яшириб, Ўзбекистон ҳудудига олиб кирган. Маҳаллий фуқаролар эса ушбу моддаларни тарқатиш билан шуғулланган.
Тадбир давомида жами 37 кг 421 грамм “экстракцион опий” ашёвий далил сифатида олинган. Ҳозирда гумонланувчиларга нисбатан жиноят иши қўзғатилиб, уларга нисбатан қамоқ эҳтиёт чораси қўлланилган. Тергов ҳаракатлари давом этмоқда.
