Россия фуқаролигини олиш тартибига янги талаб киритилди. Бу ҳақда Zamon.uz маьлум қилди.
Эндиликда фуқаролик олиш учун ариза топшираётган хорижий фуқаролар ва фуқаролиги бўлмаган шахслар судланганлик ҳолати мавжуд эмаслигини тасдиқловчи маълумотнома тақдим этиши шарт бўлади.
Тегишли фармон Россия президенти Владимир Путин томонидан имзоланган. Ҳужжатга кўра, маълумотнома ариза берувчининг фуқаролиги мавжуд бўлган давлатнинг ваколатли органи ёки фуқаролиги бўлмаган шахсга шахсини тасдиқловчи ҳужжат берган давлат томонидан расмийлаштирилиши лозим.
Шунингдек, ушбу ҳужжат Россия фуқаролигига ариза топшириш санасидан кўпи билан уч ой олдин олинган бўлиши керак.
Фармонда айрим тоифалар учун истиснолар ҳам назарда тутилган. Хусусан, 2028 йил 1 январгача Россия ҳудудига кўчиб ўтган Украина фуқаролари ҳамда Украинада доимий яшаб келган фуқаролиги бўлмаган шахслар мазкур талабдан озод этилади.
Россия қонунчилигига кўра, оғир ёки бартараф этилмаган судланганлик ҳолати, шунингдек, жиноий жавобгарликка тортилганлик фуқаролик олиш тўғрисидаги аризани рад этиш учун асос бўлиши мумкин.
Бундан ташқари, Россия ҳукумати фуқаролик олиш учун ундириладиган давлат божини ҳам оширишни режалаштирмоқда. Таклиф этилаётган қонун лойиҳасига кўра, бож миқдори амалдаги 4 200 рублдан 50 минг рублгача оширилиши мумкин.
