Ёхуд кондиционер бўлмаганда иссиқдан жон сақлаш сирлари
Тасаввур қилинг, ташқаридаги жазирама аямай қиздираётганда уйдаги совутгич ишдан чиқди. Энди нима бўлади? Таъмирлашга жўнатилган қурилма қайтгунича бирор чора топиш керак ахир. Ё янгисини харид қиласизми? Дарров ҳамёнингизни сиқувга олманг-да, яхшиси оддий усуллар ёрдамида уй хоналарини салқинлатишнинг синовдан ўтган усуллари билан танишинг.
Тозалаш ишлари
Эрталаб дераза ва хона эшикларини очинг-да, хўл латта билан пол, токча ва жовон юзаларини артиб чиқинг. 15 дақиқадан сўнг пол ва токча юзасига теккан сув буғланиб бўлади. Ана шундан кейин дераза ва эшикларни ёпиб, пардаларни туширасиз. Мазкур усулни бир кунда 2-3 марта такрорлаш мумкин.
Вентилятор + сув
Навбатдаги усул парракнинг «билак» ларига куч қўшиб, хонани салқинлатишга ёрдам беради. Демак, вентилятор ёнига сув тўлдирилган челакни қўйинг-да, қурилмани ишга туширинг. Сунъий шамол таъсирида челакдаги сув буғланиб, хона ҳарорати 2-3 даражага пастлайди.
Хитойчасига...
Балконнинг деразаларини очиб, ҳўлланган мато тутинг. Мато қуриб бўлгунича ичкаридаги ҳарорат анчайин пастлайди. Шундан кейин дераза ойналарини қайта беркитиб оласиз. Бу усул Ҳиндистон ва Хитойда кенг тарқалган.
Сув солинган “грелка”
Уйқуга ётишдан бир неча соат олдин “грелка”ни сув билан тўлдиринг-да, яххонага қўйинг. Музлаган грелка каравот ёнига қўйилса, хона иссиқлигини камайтириб, намлик даражасининг ошишига кўмак беради. Бу усулни сув солинган баклажка билан ҳам бажариш мумкин.
Қуёшга чап берамиз
Агар хона деразаси қуёшнинг тик тушган тарафига қараб турган бўлса, қуйидаги усулдан фойдаланишингиз мумкин. Хўжалик моллари дўконидан қуёш нурини қайтарувчи елимли қоғоз сотиб олинг. Қоғозни дераза ойнасига ёпиштирсангиз кифоя.
Елвизакни назорат қилинг
Хоналардан бирининг деразасини очинг-да, вентиляторни ишга туширинг. Вентилятор ҳаво оқимини ташқарига ҳайдасин. Иккинчи хона деразасини очганингизда эса елвизак ҳосил бўлади. Шу йўсинда хоналарни салқинлатиш мумкин.
Иссиқликни қувинг
Телевизор, микротўлқинлик печ, дазмол, ҳатто хона чироқларини ҳам бекорга сарфламанг. Ишлатмаяпсизми, ўчириб қўйинг. Шунда хона ҳам исиб кетмайди.
Хонада чанг тўпланмаслиги учун гиламларни вақтинчалик йиғиб қўйинг. Кун давомила бир неча марта полни артиб турсангиз, хона ҳароратини назорат қилоласиз.
Эшиклар очилади!
Ваннага совуқ сув тўлдиринг-да, ваннахона эшигини очиб қўйинг. Сўнг барча хона чироқларини ўчирсангиз, ваннада буғланаётган сув намлиги аста хоналарга тарқайди.
Гулларга сув сепинг!
Кўп қаватли уй айвони ёки хона токчасига жойлаштирилган гул баргларига тез-тез сув сепиб туринг. Ўсимлик ажратган кислород хонага тарқаб, ҳавонинг тозаланишига ёрдам беради.
Юлдуз тайёрлади
