Ўзбекистон Республикаси Президентининг 2026-йил 20-апрелдаги ПҚ–148-сон қарорига кўра, “Янги Ўзбекистон ёшлари – 2030” стратегияси доирасида ёшлар бандлигини таъминлаш ва тадбиркорликни ривожлантириш бўйича қўшимча чора-тадбирлар белгиланди.
Унга мувофиқ, 2030-йилгача 20 минг нафар ёшни тадбиркорликка ўқитишга қаратилган “Янги авлод тадбиркорлари” дастури йўлга қўйилади. Дастур доирасида маҳаллий ва хорижий экспертлар ҳамда хусусий сектор вакиллари жалб этилади.
Иштирокчиларга бизнес лойиҳаларини ишлаб чиқиш, сотувга чиқиш ва бозорни кенгайтириш каби йўналишларда билим ва кўникмалар берилади. Якунда энг яхши натижа кўрсатган 1 минг нафар ёшга Ёшлар ишлари агентлиги сертификати топширилади.
Сертификат эгалари учун БҲМнинг 500 бараваригача миқдорда, Марказий банк асосий ставкасининг 50 фоизи миқдоридаги фоиз билан 3 йилгача муддатга, 6 ойлик имтиёзли даврли ссуда ажратилади.
Шунингдек, 2026-йил 1-августдан бошлаб янги ташкил этилган ёшлар раҳбарлигидаги фермер хўжаликларига 2 йил давомида бепул бухгалтерия хизмати кўрсатилади.
2026-йил 1-июлдан эса ёшлар тадбиркорлик субъектларини электр энергияси, ичимлик суви ва канализация тармоқларига улаш харажатларининг бир қисми давлат томонидан қоплаб берилади.
