“NX Robo” компанияси интеллектуал функцияларга эга BIG-i роботини тақдим этди. Ускуна оиланинг аъзосига айланиши мумкин, деб таъкидлайди “Hi-Tech.Mail.ru”.
Робот уй ичида кичик ғилдираклар ёрдамида юради. У оила аъзоларининг овози ва юзини танийди, уларни бегоналардан ажратади, инсон нутқини тушунади. Шунингдек, янги робот кундалик режаларни эслатиб туриши мумкин.
У ҳар бир буйруқни қисқа алгоритмга айлантириб, шу асосда бажаради. Масалан, унга “Ҳамма кетганидан сўнг чироқни ўчир”, дейилса, у хонани барча тарк этишини кутиб туради, сўнг чироқни ўчиради.
Робот ўрганишга қодир — секин-аста у функцияларини бойитиб боради ва ахийри чинакам оила аъзосига айланади. Бундан ташқари, у “Юлдузли жанглар”даги машҳур R2D2 роботига ўхшаб кетиши билан диққатга сазовор. Унга қоғоздан либос кийдириш мумкин — бу роботнинг функцияларига таъсир ўтказмайди.
