Телефоннинг сифатсиз ишлаши ёки бузилиши учун унга бир неча томчи сув тушиши кифоя қилади. Шубҳасиз, бундай ҳолатда телефонни тузатиш учун телефон созловчи устанинг олдига чопамиз. Аммо яқин атрофимизда бундай уста бўлмаса-чи? Қуйида сизни телефонингиз сувга тушганда унга “биринчи ёрдам” кўрсатишнинг 10 усули билан таништирамиз...
- Телефон сувга тушиб кетганда, уни дарҳол сувдан олиб, ўчириш керак. Чунки телефон деталлари бир неча сонияда сувни ўзига сингдириш хусусиятига эга. Телефоннинг қуриганига ишонч ҳосил қилмагунча, ёқманг. Бундан ташқари, телефон ичига сув кирганда, қисқа туташув ҳосил бўлиб, куйиб қолиши мумкин.
- Телефонни сувдан олгач, дарҳол қопқоғини очиб, батареясини чиқаринг. Бу ички схема зарарланишининг олдини олади. Телефонни ва унинг деталларини эҳтиёткорлик билан юмшоқ мато ёки қоғоз сочиқ билан артинг.
- SIM-картани чиқаринг. Уни қуритиш учун маълум муддатга бир четга олиб қўйинг. Ўзи қуриб, фойдаланиш учун тайёр бўлмагунча қўл теккизманг.
- Телефонни ўчиргандан кейин унинг ғилофини, ҳимоя плёнкасини, қулоқчинни, хотира картаси (флешка)ни ҳам чиқариб олиш керак бўлади.
- Агар уйингизда чангютгич бўлса, телефон ичидаги сувни тортиб олишда фойдаланишингиз мумкин. Унинг ичидаги намликни пуфлаб чиқаришда ҳар бир деталини 20 дақиқадан тозалашга тўғри келади. Бунда телефонни тўхтовсиз айлантирган ҳолда ҳамма томонидан чангютгич билан тозалаш лозим. Телефонни чангютгич резина ичагига жуда яқин тутманг, акс ҳолда статик электр пайдо бўлиб, телефон баттар ёмон ишлайди.
- Телефонни ҳеч қачон соч қуритиш учун ишлатиладиган фенда қуритманг. Фен юзада турган сувни телефоннинг ичига ҳайдайди. Бу телефоннинг ички қисмида жойлашган электрон таркибий қисмлар учун жуда хавфлидир. Бундан ташқари, фендан чиқаётган иссиқ ҳаво туфайли телефоннинг баъзи бир деталларини эритиб юборишингиз мумкин.
- Телефонни қуруқ гуруч солинган пакетда ҳам қуритиш мумкин. Чунки гуруч намликни тортиш хусусиятига эга. Телефон гуручга солинганда, у аккумулятор намлигини ўзига тортиб, занглашнинг олдини олади. Телефонни гуручли пакетга солаётганда қопқоғини очиб, аккумуляторини чиқариб, ҳаммасини битта қилиб солиш лозим бўлади. Телефон гуруч ичида 2-3 кун туриши керак. Бу узоқ давом этадиган жараён бўлиб, шошиладиган бўлсангиз, телефонсиз қолишингиз мумкин. Уни вақти-вақти билан айлантириб туринг, шунда гуруч сувни яхшироқ тортади. Гуручнинг ўрнига пойабзал ичига солиб қўйиладиган силикогелдан ҳам фойдаланишингиз мумкин. У намликни ўзига гуручдан ҳам яхши сингдиради. Бундай ҳолатда телефонни ҳар 6 соатда текшириб туриш лозим бўлади. Агар суви устига чиқиб қолган бўлса, чангютгич ёрдамида ёки қоғоз сочиқ ёрдамида тозалаш мумкин.
- Телефонни очиб, қуритиш учун қуёш тушиб турган жойга қўйиш ҳам мумкин. Унинг тагига қоғоз салфетка ёки сочиқ қўйинг, у қолган сувни ўзига тортиб олади.
- Камида 24 соат ўтгандан кейин телефон батамом қуриганига ишонч ҳосил қилинг. Унинг барча портларини, оралиқларини, тирқишларини текшириб чиқишдан эринманг. Агар у қуп-қуруқ бўлса, аккумуляторини жойига қўйиб, ёқиш мумкин. Ёққанда ғалати товушлар, шовқин чиқишига эътибор беринг. Агар шундай ҳолат рўй берса, бу унинг нотўғри ишлаётганидан далолат беради.
