Президентнинг “Тиббиёт ва фармацевтика ходимларини қўллаб-қувватлаш чоралари тўғрисида”ги қарорига кўра, соҳа ходимларини моддий ва ижтимоий жиҳатдан рағбатлантиришга қаратилган бир қатор янги имтиёзлар жорий этилди.
Қарорга мувофиқ, 2026 йил 1 январдан:
Камида 15 йил иш стажига эга тиббиёт ва фармацевтика ходимларининг фарзандларига олий таълим муассасаларининг бакалавриат йўналишидаги йиллик контракт тўловининг 30 фоизи, аммо базавий ҳисоблаш миқдорининг 15 бараваригача бўлган қисми давлат томонидан қоплаб берилади;
Давлат тиббиёт муассасаларида камида 15 йил иш стажига эга бўлган 500 нафар тиббиёт ходими уй-жой билан таъминланади, ипотека асосида сотиб олинадиган уй учун дастлабки тўловнинг 25 фоизи давлат ҳисобидан қопланади;
Туман ва шаҳар даражасида янги даволаш усулини жорий қилиб, ижобий натижага эришган шифокорлар БҲМнинг 50 баравари миқдорида бир марталик пул мукофоти билан тақдирланади.
Қарор соҳа ходимларининг меҳнатини муносиб баҳолаш, уларни қўллаб-қувватлаш ва тиббиёт тизимида мотивацияни оширишни мақсад қилади.
