Аёл ҳаётда ишбилармон, оилада чаққон, ҳаракатчан келин, меҳрибон она бўлиши мумкин. Буларнинг ҳаммасига улгуради. Аммо саломатлигига хафсала қилмайди. Бунинг ортидан кези келса, яхшигина панд ҳам ейди. Шунда ҳам «қирқта жони бор» нақлига амал қилиб, ҳеч нарса бўлмагандек юраверади. Хўш, бу қачонгача давом этади? Вақтида қаратилмаган бетоблик ортидан жиддий касалликка йўлиқққанидами? ҳар бир аёл саломатлигидаги арзимас ўзгаришга ҳам эътибор бериши, касаллик чақирувчи белгиларни билиши керак. Мавзу юзасидан олий тоифали шифокор Хулкар РАВШАНОВАга юзландик.
ДИҚҚАТ ҚИЛИНГ!
Аёлнинг саломатлигига таъсир қиладиган белгилар сони аслида жуда кўп. Асосийлари эса қуйидагича:
1. Оғриқ. Бел, биқин, қорин пастида юзага келадиган гоҳо симиллаб, ўтиб кетадиган оғриқ жиддий безовталикка ўхшамаса-да, аслида организмингизга кўмак кераклигини дараклайди. Маълумотларга кўра, шифокорга мурожаат этувчи аёлларнинг аксарияти оғриқ бўлгани, бироқ ўтиб кетгани учун эътибор бермаганликларини айтишади. Демак, бу белгини сезган заҳоти вақтни бой бермай, шифокорга учранг. Зеро ушбу аъзолардаги оғриқ яллиғланиш жараёнларини билдириши мумкин.2.Ҳайзнинг вақтида келмаслиги ёки ҳаддан зиёд келиши.ҳайзнинг кўп миқдорда келиши бачадон миомаси, киста, тухумдондаги ўсма пайдо бўлишини билдиради.
3. Оқчил. Жинсий аъзолардаги шамоллаш, яллиғланиш жараёни кечаётганидан дарак беради. Кўпчилик аёллар бунга, ҳатто, эътибор беришмайди. Айнан оқчил бепуштликдан тортиб, бачадон, тухумдонларда жиддий ўзгаришларга сабабчидир.
4. Қон ажралмалари. Қанчалик арзимас ва кам бўлмасин, жиддий даволашни талаб этади. Мисол учун, алоқадан кейин қиндан нимпушти ажралмалар келишибачадон эрозиясида кузатилади.
5. Ёндош аъзолар ишининг бузилиши. Аёл насл қолдирувчи аъзоларидаги ўзгаришлар сийдик пуфаги, тўғри ичакни зарарлайди. Бу аъзоларда оғриқ сезсангиз ёки тез-тез кичик ҳожатга қатнаш, ачишиш ҳиси безовта қилса, албатта, шифокор-гинеколог ва урологга учранг. Негаки, шу тариқа аёлда цистит ва бавосил касалликлари ривожланиши мумкин.
Манба: «SUG‘DIYONA» газетаси
