Маросим якунлангач, гигант полотно 10 минг дона одатий футболкага ажратиб юборилди. Хоҳловчилар ушбу футболкаларни сотиб олиш имконига эга, тўпланган маблағ эса онкологик касалликлар билан курашишга йўналтирилади. Шу тариқа акция ташкилотчилари нафақат ёрқин, балки фойдали рекорд муаллифига айланишди...
“Equilíbrios Camisetas Promocionais” ташкилоти бир неча йиллардан буён Ер юзида онкологик касалликка чалинган беморларга ёрдам бериб келади. Бу сафар улар “Гиннесс рекордлари китоби” қаҳрамонлари бўлиб, шу орқали яна бир бор жамоатчилик эътиборини ушбу долзарб муаммога қаратдилар.
Гап бу ерда Бразилиядаги шаҳарлардан бирида тикилган дунёдаги энг улкан футболка ҳақида кетмоқда. Бир неча юзлаб инсонлар 11 минг соат тер тўкиб, эни 63 метр, узунлиги 93 метр, оғирлиги 4 минг 500 кг. бўлган кийимни тайёрладилар. Футболканинг нақадар улканлигини ҳис этиш учун шунчаки одатий футбол майдонини кўз олдига келтириш кифоя.
Рекордни расмийлаштириш учун “Гиннесс рекордлари китоби”нинг расмий вакили таклиф этилди. Масъул шахс акция ташкилотчиларига уларнинг футболкаси ҳақиқатан ҳам сайёрамизда тикилган энг улкан футболка эканини тасдиқловчи сертификатни топширди.
