Илон Маск жума куни дунёда биринчи триллионер мақомини қўлга киритди. Бу ҳолат унинг SpaceX компанияси акциялари фонд бозоридаги йирик IPO жараёнидан сўнг кескин қимматлашиши билан боғланмоқда. Бу ҳақда BBC хабар берди.
Bloomberg рейтингига кўра, Tesla ва SpaceX асосчиси бўлган Маскнинг умумий бойлиги 1,11 триллион долларга етган.
Маълумотларга кўра, SpaceX компанияси Nasdaq биржасида 2,2 триллион долларлик баҳолаш билан листинг қилинган. Акциялар бошида 135 доллардан таклиф этилган бўлса-да, савдо 150 доллардан очилган ва 176,50 долларгача кўтарилган. Кейинчалик акциялар 161 доллар атрофида якунланган.
IPO жараёни орқали SpaceX 75 миллиард долларлик инвестиция жалб қилган.
Bloomberg маълумотида қайд этилишича, Маск компанияда 42 фоиз улушга эга бўлиб, унинг SpaceX’даги активлари 767,1 миллиард долларга баҳоланган. Шунингдек, у Tesla акциялари ва опционлари орқали яна юзлаб миллиард долларлик бойликка эга.
Маскнинг триллионер мақоми эса дунёда бойликлар тенгсизлиги ҳақида баҳсларни кучайтирди. Унинг бойлиги айрим давлатларнинг умумий иқтисодий ҳажмига тенг экани қайд этилмоқда.
Маълум қилинишича, Маск АҚШ сиёсий жараёнларида ҳам фаол иштирок этиб, Доналд Трамп сайлов кампаниясига катта миқдорда маблағ ажратган. У шунингдек, бир неча давлат идоралари фаолиятида кескин қисқартиришлар бўйича ташаббуслар билан чиққани айтилмоқда.
Унинг бу қарорлари ва баёнотлари халқаро жамоатчиликда турли баҳс ва мунозараларга сабаб бўлмоқда.
