–Бурним каттароқ уни жарроҳлик амалиёти ёрдамида кичиклаштириш мумкинми? Бурунни кичик қилиб кўрсатувчи пардоз усуллари-чи, фойда берадими?
Малика
–Бурун шаклини ўзгартириш амалиёти пластик жарроҳликда ринопластика деб аталади. Амалиётнинг мураккаблиги – натижаси ҳар доим ҳам қониқарли бўлмаслигидадир. Сизнинг ҳолатингизда, аввало, бурун шаклидаги ёқмайдиган тарафларини таҳлил қилиш керак. Масалан, суяги катта ёки уч қисми кенгайганми, бурун тешиклари йирикми? Шуларни кўрмай туриб, аниқ тавсия беролмаймиз. Шу боис пластик жарроҳ кўригидан ўтишингиз ва ўзаро маслаҳатлашган ҳолда бир тўхтамга келишингиз керак. Пардоз масаласига келсак, йирик жингалакли турмакдан фойдаланиш бурунни нисбатан кичик кўринишига хизмат қилади. Бурун қанотларига тўқроқ тонал крем, бурун марказига эса оқ упа суртиш орқали ҳам бу нуқсонни бартараф қилиш мумкин.
