2014 йилда дунёда интернетга уланган тахминан 12 миллиард дона ёки ҳар бир киши бошига 1,7 дона қурилма ишлатилади. Бу ҳақда Strategy Analytics таҳлил компанияси тадқиқотларига асосланиб dono.uz хабар беради.
2020 йилга келиб интернет-қурилмаларнинг сони 33 миллиард дона — киши бошига 4,3 тагача етади.
Тадқиқотда интернетга уланиши мумкин бўлган барча қурилмалар – смартфон, шахсий компьютер, планшет, «ақлли» уй, smart-ТV, интернетга уланган медиа-қурилмалар (ўйин приставкалари, медиаплеер) ва кўтариб юриш мумкин бўлган электрон қурилма («ақлли» соат, фитнес-трекер)лар ҳисобга олинди.
Шахсий компьютер, смартфон ва планшет каби анъанавий қурилмалар ҳозирда интернетга уланган ва фойдаланилаётган барча қурилмаларнинг учдан бир қисмига яқиндир.
Қурилмалар сонининг шиддат билан ўсишини аналитиклар интернет воситаларининг қуйидаги туркумларида кузатди: машиналараро ўзаро таъсир аппаратураси (М2М), «ақлли» буюмлар («ақлли» соатлар), «ақлли» электр таъминот тармоқлари (smart grid) ва «ақлли» шаҳарлар. Улар ҳозирнинг ўзидаёқ дунёдаги интернет-қурилмаларнинг деярли ярмини ташкил қилмоқда. 2020 йилга келиб бу йўналишлар интернетга яна 17,6 миллиард мосламани қўшиш имконини беради.
«Айни пайтда буюмлар интернетига беш миллиард қурилма уланган, биз ҳозир мазкур инқилобнинг бошланғич босқичидамиз, — деб қайд этди Strategy Analytics маърузасининг муаллифи Эндрю Браун. – ‘Ақлли’ шаҳарлар ва ‘ақлли’ электр таъминот тармоқлари яқин келажакда ҳар бир инсоннинг ҳаётига таъсир қиладиган икки йўналиш ҳисобланади».
