Мазкур қотиллик жиноятини фош этиш йўлида ишга алоқадорлиги гумон қилинган шахслар терговга жалб қилиниб, уяли алоқа рақамлари таҳлил қилинди, уларнинг яшаш хонадонларида тинтув ва турли экспертизалар ўтказилди. Натижада, мазкур жиноят наманганлик фуқаро Орифжон Собиров (исм-фамилиялар ўзгартирилган) томонидан содир этилганлиги фош бўлди...
1985 йилда туғилган самарқандлик Сабина Турғунова турмушга чиқиб, бир нафар фарзандли бўлгач, эри билан қонуний ажрашмасдан туриб, уйига қайтиб келди. Боласини онасига қолдириб, Тошкентдаги кафелардан бирига ишга жойлашди.
Шундай кунларнинг бирида Орифжон билан танишиб, у билан яшай бошлади. Пойтахтда улар билан бирга 1991 йилда туғилган Хосият Эшмирзаева ҳам истиқомат қиларди.
Бир куни Сабина ишга боришини айтиб, кечки пайт уйдан чиқиб кетди. Туни билан ҳам хавотир, ҳам рашк ўтида қовурилиб чиққан Орифжон уни ҳақоратли сўзлар билан кутиб олди. Сабина ҳам шунга яраша жавоб қайтарди. Жанжал авжига чиқди. Сабина йигитга ҳеч ким эмаслиги, ишига ҳам аралашишга ҳаққи йўқлигини айтиб, меҳмонхонага чиқиб кетганида Орифжон чидаб туролмади. Орқасидан югуриб кирди-да, қизни бўға бошлади. Қиз овоз чиқармай, ерга йиқилгандан кейингина, қўлини бўшатди. Уни ўлди дея гумон қилиб, қилмишидан қўрқиб кетди. Бироқ тезда ўзини қўлга олиб, вазиятдан чиқиш йўлини қидира бошлади.
Бир маҳал ухлаб ётган Хосиятни эслаб қолди ва уни ҳам “йўқотиш”га киришди. Стол устида ётган ошхона пичоғини олиб, Хосиятни бир қўли билан бўғиб, ерга йиқитгач, пичоқни ишга солди... Ишни битириб, меҳмонхонага кирса, Сабина нафас олаяпти. Уни судраб, ваннахонага олиб кирди ва кир ёйишга мўлжалланган арқонни бўйнидан айлантириб, яна бўға бошлади. Ўлганига ишонч ҳосил қилгандан кейин одамлар енгил табиатли қиз эканлигини билишсин, дея шимини ечиб ташлаб, устига чойшаб ёпиб қўйди. Сўнгра, ҳар иккала қизнинг қўл телефонларини олиб, уйни тарк этди...
Рашк туфайли икки инсон дунёдан бевақт кўз юмди. Бунга сабабчи бўлган кимса эса суднинг ҳукми билан 23 йил муддатга озодликдан маҳрум этилди.
Манба: “Ҳуқуқ” газетаси
