Shavkat Mirziyoev bu haqda Bektemir tumanidagi «Cooperation LAB» markazining o`zida hududlarda sanoat kooperasiyasi va mahalliylashtirishni kengaytirish masalasi bo`yicha yig`ilishda aytib o`tgan.
Bektemir tumani faollari bilan uchrashuvdan so`ng davlatimiz rahbari mamlakatimizda ishlab chiqarilishi loyihalashtirilgan maxsus avtomobillarni ko`zdan kechirdi.
O`zbekiston Prezidentining 2019 yil yanvarda Germaniyaga rasmiy tashrifi chog`ida «O`zavtosanoat» AJ va «Volkswagen» konserni o`rtasida hamkorlik shartnomasi imzolangan edi. Unga muvofiq, Jizzax avtomobil zavodida 3 xil modifikasiyadagi Volkswagen Caddy minivenini ishlab chiqarish rejalashtirilgan. Etti o`rinli bu avtomobil turli sohalarga ixtisoslashtirish uchun juda mos keladi. Shuningdek, Isuzu zavodida ham qulay platforma mavjud.
Ma`lumki, mamlakatimizda engil avtomobillar, yuk mashinlari va maxsus texnikalar ishlab chiqarilib, aynan shu yo`nalishdagi segment bo`sh edi. Qo`shni davlatlarda ham bunday avtomobillarga ehtiyoj bor.
Shu maqsadda tajriba tariqasida Volkswagen, Škoda va Isuzu liniyasida maxsus mashinalar namunalari tayyorlandi.
Shavkat Mirziyoev bunday yangi yo`nalish import o`rnini to`ldirish va eksportni kengaytirishda muhim ekanini ta`kidlab, kerakli ko`rsatmalar berdi.
Ushbu mashinalar joriy yilning to`rtinchi choragida Jizzax avtomobil zavodida yig`ila boshlaydi. 2022 yildan ishlab chiqarishning to`liq siklini o`zlashtirish rejalashtirilgan.
