Mana, oradan oylar o`tishiga qaramay, hamon pandemiyaning shashti pasaygani yo`q, kasallanish ko`rsatkichi oshib bormoqda. Shu bilan birga, bu xastalikdan shifo topib sog`lom hayotga qaytayotganlar ham anchagina. Buning zamirida oq xalatli najot farishtalari – tibbiyot xodimlarining hissasi beqiyos.
Shavkat Mirziyoev: "Dunyoda ikki soha vakillari o`z kasbiga sadoqat borasida qasamyod qabul qiladi: bular – Vatan himoyachilari bo`lgan harbiylar va inson salomatligiga mas`ul shifokorlar. Buning bejiz emasligini bugun hayotning o`zi tasdiqlamoqda. Muqaddas qasamyodiga sodiq bo`lgan shifokorlarimiz hozirgi murakkab vaziyatda, kerak bo`lsa, aziz jonlarini fido qilib, qahramonlarcha mehnat qilmoqdalar".
Shunday hamshiralardan bir guruhi ushbu kasallik haqidagi qarashlari, bemorlar bilan ishlash jarayonida orttirgan tajriba va taassurotlari, ruhiy kechinmalari xususida qisqacha so`zlab berishdi.
Nodira Ilyosova, Respublika epidemiologiya, mikrobiologiya va yuqumli kasalliklar ilmiy tekshirish instituti klinikasi reanimasiya bo`limi hamshirasi.
Nodira Ilyosova,
Respublika epidemiologiya, mikrobiologiya va yuqumli kasalliklar ilmiy tekshirish instituti klinikasi reanimasiya bo`limi hamshirasi:
– Yuqumli kasalliklarga qarshi kurashish sohasida 11 yillik tajribam bor. Bizning klinikamiz joriy yil 1 apreldan bemorlarni qabul qila boshladi. Ungacha ham bu kasallikka chalingan bemorlarni qabul qilib, ko`rikdan o`tkazib, kasallik aniqlanganlarni Respublika virusologiya ilmiy tekshirish instituti klinikasiga yo`naltirib turdik.
Bir reanimasiya bo`limida 4 nafar hamshira ishladik. har olti soatda navbat almashib turdik. Maxsus liboslarimizni steril muhitga chiqqandagina echishimiz mumkin edi. Ishlab tajriba orttirganim sayin o`zimga ishonchim kuchaya bordi. Tibbiyot xodimi agar belgilangan sanitariya qoida va me`yorlariga qat`iy rioya etsa, kasallikdan himoyalanish va bemor salomatligini tiklash orqali ishda katta natijaga erishishi mumkin ekan.
~~~~~~~~~~~~~~~~~~~
Nazokat Abdurahmonova, Xiva tuman tibbiyot birlashmasi yuqumli kasalliklar bo`limi navbatchi hamshirasi.
Nazokat Abdurahmonova,
Xiva tuman tibbiyot birlashmasi yuqumli kasalliklar bo`limi navbatchi hamshirasi:
–Tumanimizdan to`rt kishi – bir nafar vrach, ikki nafar hamshira va bir nafar kichik tibbiy xodim viloyat Endokrinologiya dispanserida qariyb bir oy faoliyat yuritdik. Bemorlarning barchasi xorijda kasallik yuqtirib qaytgan yurtdoshlarimiz edi.
Bemorlar tibbiy muolajalar bilan bir qatorda ruhiy ko`makka katta ehtiyoj sezardi. Shunday vaziyatda ularga tirgak bo`la olganim – mening baxtim. Ish faoliyatim yakunlangach, karantin muddatini o`tadim. Qariyb bir oy mobaynida “COVID-19”ga qarshi kurash jarayonida orttirgan tajribam meni bugun ishga boshqacha nazar, yangicha tafakkur bilan qarashga undayapti.
~~~~~~~~~~~~~~~~~~~
Sevara Shokirova, Toshkent shahar 1-son bolalar klinik shifoxonasi reanimasiya bo`limi hamshirasi.
Sevara Shokirova,
Toshkent shahar 1-son bolalar klinik shifoxonasi reanimasiya bo`limi hamshirasi:
– Virusologiya ilmiy tekshirish instituti klinikasida reanimasiya bo`limida og`ir bemorlarni parvarish qilishda ko`maklashdim. Bemorlardan biri bo`lmish katta yoshli otaxonda qandli diabet, xafaqon kasalligi bor edi. Uni bir necha kun sun`iy nafas berish apparatiga ulab qo`yishdi. Malakali olimlar va shifokorlarning birgalikdagi sa`y-harakati tufayli bemorning ahvoli o`nglanib, shifo topib, oilasi bag`riga qaytdi. Shunday lahzalarda bemorning va uning yaqinlari quvonchini ko`rish qanchalik quvonchli ekanini so`z bilan ifodalab berolmayman.
Jimjimador so`zlashni bilmaymanu, lekin u erda o`tgan kunlarim menga yashashning asl mazmunini anglashga, kasbimdan faxr tuyishga turtki berdi. Odamlarga, ayniqsa, bemorlarga yordam qo`lini cho`zish asl baxt ekanini angladim.
~~~~~~~~~~~~~~~~~~~
Farida RAJABOVA, Buxoro viloyati ko`p tarmoqli tibbiyot markazi nevrologiya bo`limi hamshirasi.
Farida RAJABOVA,
Buxoro viloyati ko`p tarmoqli tibbiyot markazi nevrologiya bo`limi hamshirasi:
– Bizning shifo muassasamiz joriy yil 8 apreldan karantinga yopilib, koronavirusga chalingan bemorlarga tibbiy xizmat ko`rsatishga ixtisoslashtirildi. Bu erda charter reys bilan Rossiyadan keltirilgan yurtdoshlarimiz orasidan ushbu infeksiya aniqlangan bemorlarni davoladik. Ellik nafardan ko`proq hamshiralar navbat asosida bemorlarni parvarish qildik.
Ko`p holatlarda bemorlarni kasallikdan ko`ra ruhiy tushkunlik qiynardi. Ular bilan alohida-alohida ishlashga to`g`ri keldi. Har birida kasallikdan tuzalishga ishonch uyg`otish uchun bor mahoratimizni ishga soldik va bunga erishdik.
Sog`liqni saqlash vazirligi
Jamoatchilik bilan aloqalar bo`limi.
