Apple kompaniyasi Samsung Electronics ustidan sudga arz qildi va raqibini patent huquqini buzganlikda ayblab, 180 million dollar jarima talab qildi. Bu haqda “Lenta.ru” xabar bermoqda.
Apple rahbariyatining ta`kidlashicha, Samsung kompaniyasi 2012 yildagi sudlashuvlardan so`ng aybdor deb topilishiga asos bo`lgan o`sha beshta qurilmalarni sotish orqali kompaniyaga moddiy zarar keltirgan.
2012 yilda Janubiy Koreyaning Samsung kompaniyasi iPhone ishlab chiqaruvchisining patent huquqini buzganlikda ayblangan edi.
Joriy yilning 4 dekabrida Samsung Apple bilan besh yillik patent mojarolaridan so`ng birinchi marta 548 million dollar jarima to`lashga rozi bo`lganligi ma`lum qilingan edi.
Apple birinchi marta 2011 yilda Samsung ustidan sudga murojaat qilgan edi. 2012 yilda Samsung Amerika kompaniyasining mobil texnologiyalari va iPhone dizayni va tashqi ko`rinishiga tegishli patent huquqini buzganlikda aybdor deb topilgan edi.
Sud qarorida Samsung kompaniyasining Apple`ning patent huquqlariga kiritilgan ba`zi huquqlarni buzganligi, jumladan telefonning ustki qismi, smartfon hoshiyasi va foydalunvchining grafik interfeysini ko`chirganligi ta`kidlangan edi.
Bundan tashqari, Samsung o`z smartfonlari ekraniga ikki marta qo`l bilan tegilganida faylning kattalashishi funksiyasini ham iPhone`dan ko`chirganligi aytilmoqda.
Apple o`ziga etkazilgan moddiy zararni 2,5 milliard dollar deb baholadi. Sud summani 1 milliardga tushirdi. 2015 yilga kelib Samsung jarima miqdorini avval 930 million dollarga, keyinroq 548 million dollarga pasaytirishga muvaffaq bo`ldi.