Apple компанияси Samsung Electronics устидан судга арз қилди ва рақибини патент ҳуқуқини бузганликда айблаб, 180 миллион доллар жарима талаб қилди. Бу ҳақда “Lenta.ru” хабар бермоқда.
Apple раҳбариятининг таъкидлашича, Samsung компанияси 2012 йилдаги судлашувлардан сўнг айбдор деб топилишига асос бўлган ўша бешта қурилмаларни сотиш орқали компанияга моддий зарар келтирган.
2012 йилда Жанубий Кореянинг Samsung компанияси iPhone ишлаб чиқарувчисининг патент ҳуқуқини бузганликда айбланган эди.
Жорий йилнинг 4 декабрида Samsung Apple билан беш йиллик патент можароларидан сўнг биринчи марта 548 миллион доллар жарима тўлашга рози бўлганлиги маълум қилинган эди.
Apple биринчи марта 2011 йилда Samsung устидан судга мурожаат қилган эди. 2012 йилда Samsung Америка компаниясининг мобил технологиялари ва iPhone дизайни ва ташқи кўринишига тегишли патент ҳуқуқини бузганликда айбдор деб топилган эди.
Суд қарорида Samsung компаниясининг Apple`нинг патент ҳуқуқларига киритилган баъзи ҳуқуқларни бузганлиги, жумладан телефоннинг устки қисми, смартфон ҳошияси ва фойдалунвчининг график интерфейсини кўчирганлиги таъкидланган эди.
Бундан ташқари, Samsung ўз смартфонлари экранига икки марта қўл билан тегилганида файлнинг катталашиши функциясини ҳам iPhone`дан кўчирганлиги айтилмоқда.
Apple ўзига етказилган моддий зарарни 2,5 миллиард доллар деб баҳолади. Суд суммани 1 миллиардга туширди. 2015 йилга келиб Samsung жарима миқдорини аввал 930 миллион долларга, кейинроқ 548 миллион долларга пасайтиришга муваффақ бўлди.
