Prezident Shavkat Mirziyoev Islom sivilizasiyasi markazining qurilish jarayonini ko`zdan kechirdi. Bu haqda Prezident Matbuot xizmati xabar qildi.
Bugungi kunda bino to`liq qad ko`targan. Uning markazida ulkan sharqona gumbaz, to`rt tomonida 34 metrlik peshtoqlar qurilgan.
Davlatimiz rahbari har bir yo`lak va xonaga kirib, ularni pardozlash va jihozlashga oid loyihalarni ko`rdi.
Markazning ichki va tashqi ko`rinishi, naqshlari yuzasidan tavsiyalar berildi. Xonalarni ko`plab sayyohlar, delegasiyalar kelishi, xalqaro konferensiyalar o`tkazilishini inobatga olib zamonaviy jihozlash, ekspozisiyani turli yoshdagi insonlarga mos holda tayyorlash zarurligi ta`kidlandi.
Prezidentimiz avvalgi tashrifi chog`ida Islom sivilizasiyasi markazi shu yo`nalishdagi ilmiy muassasalar uchun negiz bo`lishi, bu erda olimlar tadqiqot olib borib, talabalar bilimini mustahkamlashi kerakligini aytgan edi.
Shunga ko`ra, loyiha takomillashtirilib, markazda Xalqaro islom akademiyasining magistrant va doktorantlari o`qishi uchun sharoit yaratish nazarda tutilgan.
Markazning interer va eksterer bezagi, jihozlanishi, kommunikasiya, xavfsizlik tizimlari eng ilg`or talablarga javob beradi.
Davlatimiz rahbari shu erda olimlar, ziyolilar, nuroniylar va mahalla raislari bilan suhbatlashdi.
- Milliy o`zlikni anglash deb ko`p gapiramiz. Lekin shunga munosib bo`lyapmizmi, degan tuyg`u meni qiynaydi, - dedi Shavkat Mirziyoev. - Ota-bobolarimiz qiyin sharoitlarda, mehnat-mashaqqat bilan qanday buyuk ishlarni amalga oshirgan. Jadid bobolarimizni ham bekorga qatag`on qilishmagan. Chunki bilishardiki, ilm, g`urur, davlatchilik bizning qonimizda bor. Bu erda hamma buyuk allomalarimizning ovozi eshitilib turadi.
Markaz joylashgan Olmazor tumanidagi har bir mahalla ushbu ma`rifat maskaniga munosib bo`lishi, bilim, tarbiya jihatidan takliflarini berishi zarurligi ta`kidlandi.
- Shuni amalga oshirsak, har bir mahallaga Islom sivilizasiyasi markazining nuri kiradi, yuzimiz yorug` bo`ladi, – dedi Prezident.
Markaz qurilishi davom etmoqda.