O`zbekiston Respublikasi Prezidenti Shavkat Mirziyoev 2 fevral kuni Afg`oniston Islom Respublikasining delegasiyasi – mamlakat tashqi ishlar vaziri Muhammad Hanif Atmar va Prezident Administrasiyasi rahbari Muhammad Shokir Korgarni qabul qildi. Bu haqda Prezident Axborot xizmati xabar qildi.
Uchrashuvda ko`p qirrali O`zbekiston-Afg`oniston hamkorligini yanada kengaytirishning dolzarb masalalari ko`rib chiqildi.
Davlatimiz rahbari ikki tomonlama munosabatlarning bugungi sur`atini saqlab qolish va avval erishilgan kelishuvlarni amalga oshirish muhim ekanini alohida ta`kidladi.
Bu borada so`z yuritilganda, avvalo, tovar ayirboshlash hajmini oshirish va uni yaqin yillarda kamida 2 milliard dollarga etkazish uchun qulay sharoitlar yaratish, sanoat, energetika, qishloq xo`jaligi va logistika sohalarida kooperasiyani kuchaytirish, sog`liqni saqlash, ta`lim va madaniyat sohalarida muhim dasturlarni amalga oshirishni qayd etish lozim.
Afg`oniston delegasiyasi a`zolari O`zbekiston Prezidentini ko`rsatilgan samimiy qabul uchun minnatdorlik bildirib, Afg`oniston Prezidenti Ashraf G`anining salomi va eng ezgu tilaklarini etkazdilar.
O`zbekistonning Afg`onistonda tinchlik va barqaror taraqqiyotni ta`minlashga qaratilgan qat`iy sa`y-harakatlari uchun chuqur minnatdorlik bildirildi.
Bugun Toshkent shahrida xalqaro moliyaviy institutlar rahbarlari ishtirokida o`tgan Transafg`on temir yo`lini qurish loyihasi bo`yicha uch tomonlama ishchi guruh birinchi yig`ilishining samarali yakunlari yuksak baholandi.
Uchrashuvda tomonlar ushbu loyihani tez fursatda tayyorlash va amalga oshirishni boshlash, qabul qilingan “yo`l xarita”si asosida xorijiy hamkorlar va salohiyatli investorlarni faol jalb qilish muhim ekanini ta`kidladilar.