O`zbekiston Respublikasi Prezidenti Shavkat Mirziyoev 2 fevral kuni mamlakatimizdagi siyosiy partiyalar rahbarlari bilan uchrashdi. Bu haqda Prezident Matbuot xizmati xabar qildi.
Ochiq muloqot chog`ida partiyalarning jamiyatimiz siyosiy-ijtimoiy hayotidagi o`rni va rolini oshirish masalalari, bugungi kunda ular oldida turgan asosiy vazifalar haqida atroflicha fikr almashildi.
Davlat va jamiyat hayotiga doir keng ko`lamli islohotlarni amalga oshirishda, xalqimiz huquq va manfaatlarini himoya qilishda siyosiy partiyalarning o`rni kattaligi ta`kidlandi.
Mamlakatimizda hududlarni kompleks rivojlantirish, aholi farovonligini oshirish, kambag`allikni qisqartirishga alohida e`tibor qaratilmoqda. Iqtisodiy-ijtimoiy sohalarni qamrab olgan ko`plab dasturlar amalga oshirilmoqda. Tadbirkorlikni rivojlantirish, aholini ish bilan ta`minlash ustuvor vazifa etib belgilangan. Bu boradagi ishlarning ijrosini nazorat qilish Oliy Majlis palatalari va mahalliy kengashlarga ulkan mas`uliyat yuklaydi.
Uchrashuvda ijtimoiy sohalar, ayniqsa, ta`lim va sog`liqni saqlash tizimini rivojlantirish masalalariga alohida to`xtalib o`tildi. Siyosiy partiyalar o`z deputatlari orqali joylardagi ijtimoiy-iqtisodiy muammolarni o`rganishi, ularning echimi bo`yicha takliflar berishi, ayniqsa, ta`sirchan Parlament va jamoatchilik nazoratini olib borishi muhimligi qayd etildi.
Partiyalar o`z elektorati, ayniqsa, yoshlar, xotin-qizlar va nuroniylar bilan ishlash, ularning hayotiy muhim manfaatlarini ta`minlashga ko`maklashishi zarurligi haqida yakdil fikr bildirildi.
Har bir partiya o`z dasturiy maqsadlarini Parlamentga faol olib chiqishi, o`z fraksiyalari orqali qonunchilik tashabbuslarini ilgari surishi va qonunlar ijrosini ta`minlashni nazoratiga olishi zarurligi haqida fikr almashildi.
Muloqot jarayonida siyosiy partiyalar faoliyati bugungi zamon talablaridan kelib chiqqan holda, chuqur tahlil qilinib, ularning ishini takomillashtirish va samarasini oshirish bo`yicha fikr-mulohazalar, amaliy takliflar bildirildi.
Uchrashuvda Tadbirkorlar va ishbilarmonlar harakati –O`zbekiston liberal-demokratik partiyasi, “Milliy tiklanish” demokratik partiyasi, Xalq demokratik partiyasi, “Adolat” sosial-demokratik partiyasi hamda Ekologik partiya, Oliy Majlis Senati va Qonunchilik palatasi rahbarlari ishtirok etdi.
