Hukumat qarori (114-son, 02.03.2021 y.) bilan Davlat boshqaruvi organlari, mahalliy ijro etuvchi hokimiyat organlari va xo`jalik yurituvchi sub`ektlarda monopoliyaga qarshi kurashish komplaens tizimini joriy etish va uning ishlash tartibi to`g`risidagi nizom tasdiqlandi. Bu haqda Adliya vazirligi xabar berdi.
Nizom bilan monopoliyaga qarshi kurashish komplaens tizimining asosiy vazifalari belgilab berildi.
Nizomga ko`ra davlat boshqaruvi organlari, mahalliy ijro etuvchi hokimiyat organlari va xo`jalik yurituvchi sub`ektlarda vakolatli shaxs (bo`linma) tayinlanadi.
Vakolatli shaxs (bo`linma) monopoliyaga qarshi komplaens tizimini joriy etish va uning faoliyatini monitoring qilishni amalga oshiradi.
Shuningdek, monopoliyaga qarshi komplaens tizimini tashkil etish va uning ishlash samaradorligini baholash:
● davlat boshqaruvi organlarida – rahbar;
● mahalliy ijro etuvchi hokimiyat organlarida – hokim;
● xo`jalik yurituvchi sub`ektlarda – ijro etuvchi organ yoki kuzatuv kengashi tomonidan amalga oshiriladi.
Mazkur nizom quyidagilar uchun tatbiq etiladi:
● 2021 yil 1 yanvardan – tajriba tariqasida davlat boshqaruvi organlari, mahalliy ijro etuvchi hokimiyat organlari hamda Prezidentning 2020 yil 6 iyuldagi PF-6019-sonli Farmoni bilan tasdiqlangan ro`yxatga kiritilgan davlat ishtirokidagi korxonalar;
● 2022 yil 1 yanvardan – tabiiy monopoliya sub`ektlari, tovar yoki moliya bozorida ustun mavqega ega xo`jalik yurituvchi sub`ektlar, shuningdek oxirgi 3 yilda tovar sotishdan olingan jami tushumning o`rtacha yillik miqdori 30 milliard so`mdan oshadigan korporativ buyurtmachilar.
