Bu haqda AOKAda o`tkazilgan brifingda Innovasion rivojlanish vazirining birinchi o`rinbosari Shahlo Turdiqulova ma`lum qildi.
«Vazirlik ham xitoylik mutaxassislar bilan hamkorlik qilib keldi. Xitoyda ishlab chiqarilgan ZF-UZ-VAC2001 vaksinasining dastlabki sinov bosqichlari muvaffaqiyatli o`tkazilgani bois uning so`nggi — uchinchi klinik sinov bosqichlarini O`zbekistonda o`tkazdik.
Tahlil va o`rganishlar ko`rsatyaptiki, vaksina — mutlaqo xavfsiz va uni qabul qilgan insonda 95-97 foiz antitanachalar shakllanadi.
Ushbu vaksinani shaxsan o`zim ham oilamiz orqali sinovdan o`tkazganmiz. Sinovda qatnashgan 7 ming kishining hech birida hech qanday nojo`ya ta`siri sezilmagan. Balki allergik ta`sirlar sezilishi mumkin, ukol qilingan joylar qizarishi mumkin, biroq bundan qo`rqmaslik kerak.
Koronavirusni engib o`tishning yagona yo`li — vaksina qabul qilish. Shu bois aholini vaksinasiya jarayonida faol ishtirok etishga chaqiraman», — dedi vazir o`rinbosari.
