So`nggi yillarda davlatimiz rahbarining siyosiy irodasi va yangi O`zbekistonning xalqaro siyosatdagi ezgu tashabbuslari tufayli azaldan tili va dini bir, an`analari va urf-odatlari mushtarak qardosh qo`shni davlatlar bilan munosabatlarimiz ilgari tasavvur qilib bo`lmaydigan darajada mustahkamlanmoqda. Bu haqda Farg`ona viloyat hokimligi axborot xizmati xabar berdi.
Xabarda yozilishicha, bugun Farg`ona viloyati va Qirg`izistonning Batken viloyatlari orasida Rishton” (“Qaytpas”) va “Tul” (“Etikchi”) chegara postlari tantanali marosim bilan ishga tushirilib, Qirg`iziston orqali o`tgan So`x-Rishton yo`li qayta ochilgani ham ana shu ezgu ishlarning yana bir yorqin misoli bo`lgan.
Farg`ona viloyati hokimi Xayrullo Bozorov va Batken viloyati gubernatori Omurbek Suvanaliev ishtirokida o`tkazilgan ochilish tadbirida ikki viloyatning turli sohalari rahbarlari, keng jamoatchilik vakillari va OAV xodimlari ishtirok etishgan.
Tadbir ayniqsa, 80 mingga yaqin aholisi bo`lgan anklav hududdagi so`xliklar uchun chinakam shodiyonaga aylandi. Chunki, viloyat markaziga kelish uchun 80 km yo`l bosib, Farg`ona tumanidagi “Vodil” bojxona chegara posti orqali qatnagan yurtdoshlarimiz endi qisqa, 19 kilometrlik yo`ldan erkin foydalanish imkoniga ega bo`lganlar.
Dastlab Rishton” (“Qaytpas”) chegara postida karnay-surnay sadolari yangrab, ikki tomon vakillari bir birovlarini ochiq yuz bilan qarshi olganlar.
Marosimda so`z olganlar tomonidan davlatlarimiz rahbarlarining tashabbuslari va amaliy say`-harakatlari bilan O`zbekiston va Qirg`iziston o`rtasida aloqalar kengayib borayotgani, chegaraoldi hududlarning hamkorligi ham yangi bosqichga ko`tarilayotganligi ta`kidlandi va Prezidentlarga chin qalbdan minnatdorchilik izhor etilgan.
“Bugun tarixiy sana. Ikki qo`shni mamlakatlar aholisi azal-azaldan qon-qarindosh, ahil-ittifoq yashab kelgan bo`lsa-da, So`x tumaniga Botken orqali o`tadigan yo`lni ochish masalasi qariyb 10 yildan buyon xalqlarimiz orzusi edi. Ikki davlat Prezidentlari, hurmatli Shavkat Mirziyoev hamda Sadir Japarovlarning Toshkent shahrida bo`lib o`tgan 11-12 mart kunlaridagi oliy darajadagi uchrashuvlarida erishilgan kelishuvlar ijrosining tez va qisqa muddatda guvohi bo`lib turibmiz. Ikki davlat rahbarlarining siyosiy, qat`iy irodasi tufayli bugun mana shu yo`l ochilyapti. O`ylaymanki, bu voqe`lik barcha sohalardagi aloqalarimizni mustahkamlaydi. Prezidentimizning oldimizga qo`ygan katta vazifalarini amalga oshirish uchun imkoniyatlar yaratadi. Shuni aytish kerakki, Qirg`iziston Farg`ona viloyatining eng yaqin savdo hamkori hisoblanadi. Katta rejalarni qilyapmiz. Farg`ona-Botken viloyatlarini o`zbek-qirg`iz munosabatlarida eng namunali hududga aylantirishga va`da beramiz”, - dedi viloyat hokimi Xayrullo Bozorov.
Tantanali tadbirlar So`x va Qirg`izistonni bog`lab turuvchi “Tul” (“Etikchi”) o`tkazish punktida ham davom etdi. Bu erda ham tabrik va qutlovlar yangradi. Shu erda Farg`ona va Botken viloyatlari rahbarlari bir birlariga esdalik sovg`alarini berganlar.
Do`stlik, hamkorlik abadiy bo`lishi uchun tilaklar bildirilib, duolar qilingan.
