Avvalroq, Koreya Respublikasi Milliy Assambleyasi Spikeri Pak Byon Sok rasmiy tashrif bilan O`zbekistonga kelgani haqida xabar bergan edik.
Pak Byon Sok O`zbekistonga qilgan rasmiy tashrifini Toshkentdagi Mustaqillik va ezgulik monumenti poyiga gul qo`yishdan boshladi.
Shundan so`ng, Koreya Respublikasi Milliy Assambleyasi Spikerining O`zbekiston Respublikasi Oliy Majlisi Senatining Raisi Tanzila Norbaeva bilan uchrashuvi bo`lib o`tdi.
Uchrashuvda har ikki davlat rahbarlari mamlakatlar o`rtasidagi ikki tomonlama hamkorlikni kengaytirishga katta ahamiyat berayotgani ta`kidlandi. O`tgan yillarda O`zbekiston Prezidenti Shavkat Mirziyoev rahbarligida amalga oshirilgan islohotlar natijasida O`zbekiston-Koreya strategik va ittifoqchilik hamkorligini rivojlantirishda yangi bosqich boshlandi.
Ikki tomonlama siyosiy, iqtisodiy va madaniy-gumanitar aloqalarning jadalligi izchil o`sib bormoqda. Bu ikki mamlakat manfaatlariga javob beradi.
Tomonlar so`nggi vaqtda O`zbekiston va Koreya o`rtasidagi parlamentlararo muloqot ham faollashganini ta`kidladilar. Hamkorlik yillarida tomonlar parlament faoliyati tajribasini o`rganish, shu jumladan turli xalqaro konferensiyalar va parlament tashkilotlari ishida qatnashish doirasida muntazam ravishda o`zaro delegasiyalar tashriflarini amalga oshirdi.
2019 yilda Oliy Majlis Senati Raisi T.Narbaeva rasmiy tashrif bilan Koreya Respublikasida bo`ldi. Tashrif davomida parlament delegasiyasi Koreya Respublikasi Prezidenti Mun Chje In, Milliy Assambleya Spikeri Mun Xi Sang, Yashil o`sish global instituti rahbari Pan Gi Mun, Seul va Inchxon shahar merlari (hokimlari), shuningdek, vazirlik va kompaniyalar rahbarlari bilan uchrashuvlar o`tkazildi.
Uchrashuv davomida parlament yuqori palatasi rahbari T.Narbaeva O`zbekiston va Koreya parlamentlari o`rtasidagi aloqalar ikki tomonlama hamkorlikning yangi kun tartibi doirasida rivojlanib borayotganini ta`kidladi. 2005 yildan boshlab O`zbekiston Respublikasi Oliy Majlisining Koreya Respublikasi Milliy Assambleyasi bilan hamkorlik bo`yicha parlamentlararo guruhi muvaffaqiyatli faoliyat olib bormoqda. Senat Raisining birinchi o`rinbosari S.Safoev uning rahbaridir.
Tomonlar parlamentlararo guruhning samarali faoliyati natijalarini ijobiy baholadilar. Hozirgi vaqtda mintaqalararo hamkorlikni rivojlantirishda parlamentlararo guruhning rolini oshirish bo`yicha maqsadli ishlar olib borilmoqda.
Hamkorlikni rivojlantirish va kengaytirish masalalari ko`rib chiqildi. Jumladan, davlatlarimiz rahbarlari o`rtasida erishilgan kelishuvlarni amalga oshirish, ixtisoslashtirilgan qo`mitalar, xalqaro parlament tuzilmalari va tashkilotlari o`rtasidagi munosabatlarni rivojlantirish, deputatlar o`rtasida mintaqalararo hamkorlik o`rnatish, huquqiy bazani faol shakllantirish, pandemiyaning salbiy oqibatlarini yumshatishga qaratilgan amaliy chora-tadbirlar amalga oshirilishini ta`minlash va boshqa masalalar muhokama etildi.
Bundan tashqari, O`zbekiston-Koreya parlamentlararo muloqotni tizimli davom ettirish zarurligi ta`kidlandi. Shuningdek, islohotlar va ijtimoiy-iqtisodiy rivojlantirishni huquqiy ta`minlash, ikki tomonlama shartnomalar va bitimlarni ratifikasiya qilish masalalarini tezlashtirish sohasida tajriba almashish bo`yicha dasturlarni amalga oshirishning muhimligi ta`kidlandi.
