Oliy Majlis Qonunchilik palatasi Spikeri Nuriddinjon Ismoilov Turkiya Respublikasi Buyuk Millat Majlisi raisi Mustafo Shentop bilan telefon orqali muloqot qildi.
Turkiya parlamenti raisi M.Shentop hozirgi kunda ikki davlat o`rtasida parlamentlararo, siyosiy, savdo-iqtisodiy, investisiyaviy, madaniy-gumanitar va boshqa sohalarda an`anaviy do`stlik va sherikchilikka asoslangan hamkorlikni rivojlantirishga imkon beradigan konstruktiv va ochiq munosabat o`rnatilganligini qayd etdi.
Muloqotda ta`kidlanganidek, ikki davlat rahbarlarining samimiy do`stligi o`zaro aloqalarning yanada yaxshilanishiga xizmat qilmoqda.
M.Shentop Turkiy davlatlar ichida O`zbekistonning o`rni beqiyosligi, Markaziy Osiyo davlatlari orasida ham nufuzi, madaniy meroslarga boyligi bilan muhim ahamiyatga ega ekanini, Turkiya O`zbekistonni o`zi uchun qat`iy va ishonchli sherik sifatida bilishini aytib, o`zbek tomonining Turkiy tilli davlatlar Parlamentlararo Assambleyasiga a`zo bo`lishi bo`yicha sa`y-harakatlarini yuqori baholadi.
Muloqot chog`ida tomonlar joriy yilning 31 may – 3 iyun kunlari Islomobod shahrida o`tkazilgan Iqtisodiy hamkorlik tashkiloti (IHT) Parlament Assambleyasining 2-Bosh konferensiyasi hamda 23-24 iyun kunlari Buxoro shahrida o`tkazilgan Barqaror rivojlanish maqsadlariga erishishda global parlamentlararo hamkorlik xalqaro forumi, ularning ahamiyati haqida fikr almashdilar.
Qayd etilishicha, bu kabi forumlar o`zaro tajriba almashish, parlamentlar o`rtasida aloqalarni kuchaytirish, barqaror rivojlanish sohasida yangi usul va vositalar ishlab chiqish, sohada nazariy va amaliy tajriba almashishda o`ziga xos maydon bo`lib xizmat qiladi.
Turkiya parlamenti raisi O`zbekiston Respublikasining yaqinlashib kelayotgan davlat mustaqilligining 30 yilligi bilan ham qutladi.
Suhbatdosh O`zbekistonda amalga oshirilayotgan keng miqyosli yangilanishlar va ijtimoiy-iqtisodiy islohotlarni yuqori baholab, ikki tomonlama do`stlik va ko`p qirrali hamkorlik munosabatlarini yanada rivojlantirish va mustahkamlashga qaratilayotgan e`tiborni alohida ta`kidlab o`tdi.
Muloqotda ikki davlat parlamentlari o`rtasidagi hamkorlikni yanada rivojlantirish masalalari ham muhokama qilindi.
