Haydovchilarning mastlik holati qanday aniqlanadi?
Adliya vazirligining yangi qonun hujjatlari, huquqiy islohotlar haqida tezkor ma`lumotlar taqdim etuvchi maxsus kanali bu haqida ma`lumot berdi.
Unga ko`ra, quyidagi holatlarda mastlik holati aniqlanishi mumkin:
● haydovchining og`iz bo`shlig`idan alkogol hidi kelsa;
● haydovchi bir holatda to`g`ri tura olmasa (chayqalib turishi);
● haydovchining nutqi buzilsa;
● haydovchi qo`l barmoqlari qaltirasa;
● haydovchi yuz terisi rangi sezilarli o`zgargan bo`lsa.
Alkogoldan mastlik holati qanday aniqlanadi?
Bu 2 xil usulda amalga oshiriladi:
➖ maxsus texnik vosita – alkotester yordamida;
➖ tuman (shahar) davolash-profilaktika muassasalarida tibbiy tekshiruvdan o`tkazish orqali.
Qachon alkotester, qachon tibbiy tekshiruv qo`llaniladi?
Haydovchilarning alkogolli ichimliklar ta`siridan mast holatda ekanligini aniqlash alkotester yordamida qoidabuzarlik yuz bergan joyning o`zida amalga oshiriladi. Haydovchi alkotester yordamida tekshiruvdan o`tishdan bosh tortgan yoxud unda alkotester orqali tekshiruv natijalariga e`tiroz mavjud bo`lgan hollarda haydovchi tibbiy tekshiruvdan o`tkaziladi.
Mastlik holatini tekshirishda xolislar bo`lishi kerakmi?
— Ha, kamida 2 nafar xolis bo`lishi shart. Agar, davlat yo`l harakati xavfsizligi xizmati xodimi kuzatuv kamerasi (body camera)dan foydalangan holda tekshiruvni o`tkazgan bo`lsa, xolis bo`lishi shart emas.
Tekshiruvdan o`tishdan bo`yin tovlasa nima bo`ladi?
— Ma`muriy bayonnoma rasmiylashtirilib, 1 yilu 6 oydan 3 yilgacha bo`lgan muddatga transport vositasini boshqarish huquqidan mahrum qilinadi va 3 mln 675 ming so`m miqdorida jarimaga tortiladi).
Xuddi shunday huquqbuzarlik transport vositalarini boshqarish huquqi bo`lmagan shaxs tomonidan sodir etilsa, 7 mln 350 ming so`m miqdorida jarima yoki 15 sutka ma`muriy qamoq jazosi qo`llaniladi.
Shaxs qachon alkogol mahsulot ta`sirida mast bo`lgan deb topiladi?
➖ haydovchi tomonidan chiqarilgan havodagi etanol bug`lari konsentrasiyasi ko`rsatkichi 0,135 milligramm va undan yuqori bo`lgan hollarda (alkotester yordamida aniqlanadi);
➖ alkogol mahsulotining qondagi konsentrasiyasi 0,3 promille va undan ortiq bo`lganda (tibbiyot muassasasida aniqlanadi).
Tibbiy tekshiruv xulosasiga nisbatan e`tirozlar mavjud bo`lsa-chi?
Bunday holda haydovchi boshqa tibbiyot muassasasida qayta tibbiy tekshiruvdan o`tkazilishini talab qilishga haqli. Qayta tibbiy tekshiruvdan o`tkazish mastlik alomatlari aniqlangan yoki yo`l-transport hodisasi sodir etilgan vaqtdan e`tiboran 2 soat ichida boshqa yaqin masofada joylashgan tibbiyot muassasasida amalga oshiriladi.
Mastlik holati tasdiqlanganda qanday javobgarlik chorasi qo`llaniladi?
Ma`muriy bayonnoma rasmiylashtirilib, 1 yilu 6 oydan 3 yilgacha bo`lgan muddatga transport vositasini boshqarish huquqidan mahrum qilinadi va 6 mln 125 ming so`m miqdorida jarimaga tortiladi. Xuddi shunday huquqbuzarlik transport vositalarini boshqarish huquqi bo`lmagan shaxs tomonidan sodir etilsa, 9 mln 800 ming so`m miqdorida jarima yoki 15 sutka ma`muriy qamoq jazosi qo`llaniladi.
