Tadbirkorlarning murojaatlarini qabul qilish va tahlil etish bo`yicha tashkil etilgan Shtabga kelib tushgan murajaatlarning 78 foizdan ortig`i hal etilgan. Bu haqda Investisiyalar va tashqi savdo vazirligi axborot xizmati rahbari Gulshan Botirova AOKAda o`tkazilgan brifing ma`lum qildi.
Ma`lum qilinishicha, tadbirkorlar qulayligi uchun barcha tegishli vazirlik va idoralarning mutaxassislari jalb etilib, dam olish kunlarisiz kunu-tun faoliyat ko`rsatuvchi “koll-markaz”lar ishga tushirilgan edi. Murojaatlar, shuningdek, ijtimoiy tarmoqlar va messenjerlar orqali qabul qilindi.
Buning uchun barcha vazirlik va idoralar rahbarlaridan iborat ishchi guruhlar faoliyati yo`lga quyildi. Har bir tashkilotdan 3 nafar malakali xodimlar Respublika “Shtabi”ga biriktirildi.
Xuddi shuningdek, joylardagi hududlarda ham Shtablar tashkil etilib, har bir tadbirkorning murojaati alohida o`rganilmoqda.
Kelib tushgan murojaatlar bo`yicha Ishchi guruhlar tadbirkorlar bilan bog`lanib, individual harakterga ega bo`lgan masalalarni hal etish choralari ko`rilmoqda.
Bundan tashqari, Prezidentimizning tadbirkorlar va investorlar bilan bo`lajak ochiq muloqotiga tayyorgarlik ko`rish hamda iqtisodiyotni yanada rivojlantirish va biznes muhitini yaxshilash masalalariga oid dolzarb tendensiyalarni muhokama qilish maqsadida ekspertlar hamjamiyati bilan alohida onlayn uchrashuv tashkil etildi.
Munozara chog`ida davlat boshqaruvi, soliq va bojxona ma`murchiligi tizimlari samaradorligini oshirish, davlat korxonalari va bank sektorini xususiylashtirish, tadbirkorlar va investorlar huquqlarini himoya qilish mexanizmlarini mustahkamlash, ularni moliyaviy qo`llab-quvvatlashning yangi vositalarini yaratish va boshqa muhim masalalar alohida o`rin oldi.
Shtab faoliyati davomida 14643 ta murojaat kelib tushgan. Ularning barchasi 16 ta sohaga bo`lingan.
Tadbirkorlarimizni qiziqtirgan top-5 ta masalaga e`tibor qaratidigan bo`lsak, bular:
1. Biznesni moliyalashtirish, kreditlash va subsidiyalar bo`yicha – 6 304 ta murojaat;
2. Er ajratish masalalari bo`yicha – 2 701 ta;
3. Biznesni boshlash bo`yicha g`oyalar – 556 ta;
4. Xususiy mulkni himoya qilish bo`yicha – 473 ta;
5. Muhandislik-kommunikasiya infratuzilmasi bo`yicha – 419 ta
Hamda belgilangan kategoriyalarga tushmaydigan 2 412 ta murojaalar kelib tushgan.
Murojaatlarning aksariyati Toshkent shahar, Surxondaryo, Toshkent, Qashqadaryo, Farg`ona viloyatlaridan kelib tushgan.
1. Toshkent shahardan – 1 564 ta;
2. Surxondaryo viloyatidan – 1395 ta;
3. Toshkent viloyatidan – 1357 ta;
4. Qashqadaryo viloyatidan – 1 288 ta
5. Farg`ona viloyatidan – 1250 ta
Ayni damda kelib tushgan murajaatlarning 78 foizdan ortig`i hal etilgan.
Hozirda Shtab tomonidan murojaatlarni qabul qilish jarayonlari to`xtatilib, tahliliy guruh tomonidan kelib tushgan masalarni tizimlashtirish va tasniflash hamda aniqlangan muammolar echimini ishlab chiqish ustida ishlar olib borilmoqda.
