Joriy yilning 6-10 sentyabr kunlari Kipr matematik jamiyati va Janubi-Sharqiy Evropa matematiklar jamiyati tomonidan o`tkazilgan 38-Bolqon matematika olimpiadasi - BMO 2021 (Balkan Mathematical Olympiad) masofaviy tarzda tashkil qilindi. Ushbu olimpiadada 18 mamlakatdan 103 nafar iqtidorli o`quvchi ishtirok etdi. Bu haqda Xalq ta`limi vazirligi ma`lum qildi.
O`zbekiston jamoasi ilk bor qatnashgan mazkur onlayn xalqaro olimpiada Xalq ta`limi vazirligi Fan olimpiadalari bo`yicha iqtidorli o`quvchilar bilan ishlash departamenti va V.I.Romanovskiy nomidagi Matematika instituti bilan hamkorlikda o`tkazildi.
Xalqaro olimpiadada O`zbekiston terma jamoasi tarkibida quyidagi 6 nafar o`quvchi ishtirok etdi:
1. Muhammadrizo Majidov (Toshkent shahridagi Prezident maktabining 11-sinf o`quvchisi);
2. Iskandar Bo`riev (Aniq fanlarga ixtisoslashtirilgan davlat umumta`lim maktabi 11-sinf o`quvchisi);
3. Jasurbek Ro`zibaev (Buxoro viloyati Xalqaro matematika maktabi 11-sinf o`quvchisi);
4. Jaloliddin Xolmatov (Aniq fanlarga ixtisoslashtirilgan davlat umumta`lim maktabi 10-sinf o`quvchisi);
5. Lazizbek Rajabboev (Buxoro viloyati Xalqaro matematika maktabi 11-sinf o`quvchisi);
6. Anvar Rahmatov (Buxoro viloyati Xalqaro matematika maktabi 10-sinf o`quvchisi).
Jamoa rahbarlari sifatida Matematika instituti ilmiy xodimlari Farxod Haydarov va Jasur Bahromovlar qatnashdi.
Natijalarga ko`ra ikki nafar o`quvchi Iskandar Bo`riev hamda Lazizbek Rajabboevlar bronza medallarini qo`lga kiritdi.
3 nafar ishtirokchi Jasurbek Ro`zibaev, Jaloliddin Xolmatov, Anvar Rahmatovlar esa 4-darajali diplom bilan taqdirlandi.
