Baxshichilik san`atini xalqaro darajada o`rganishga so`nggi yillarda, ayniqsa, e`tibor kuchaygan. Buni ayni damda Nukusda bo`lib o`tayotgan II Baxshichilik xalqaro festivaliga dunyoning ko`plab davlatlaridan tashrif buyurgan mehmonlar kayfiyatidan ham ko`ryapmiz. Barcha chet ellik mehmonlar milliy qadriyatlarimizga hurmat hayrat va qiziqish bilan munosabat bildirishmoqda. Mamlakatimizda baxshichilikka alohida bir ilm, yo`nalish sifatida ahamiyat qaratilyapti.
Bugun, 18 sentyabr kuni Nukusda Madaniyat vaziri Ozodbek Nazarbekov ishtirokida “Baxshichilik san`atining jahon madaniyati sivilizasiyasida tutgan o`rni” mavzusida II Xalqaro ilmiy-amaliy konferensiyasi bo`lib o`tdi, deya xabar bermoqda "Darakchi" muxbiri Sardorbek Rahmonqulov. Anjumanga TURKSOY tasheiloti vakillari, turkiy tilli davlatlardan kelgan olimlar, professorlar, san`at arboblari ishtirok etib, o`zbek baxshichilik san`atiga o`z munosabatlarini bildirishdi.
Baxshichilikka e`tibor
Konferensiya davomida baxshichilik san`atiga so`nggi yillarda ko`rsatilayotgan e`tibor namunasi sifatida quyidagi amalga oshirilgan ishlar haqida ma`lumot berildi:
- "Alpomish" dostonining ming yilligi keng nishonlangan;
- Termiz shahrida bu ulug` badiiy obida sharafiga, Samarqand shahrida atoqli baxshilarimiz xotirasiga bag`ishlangan yodgorlik majmualari bunyod etilgan;
- "O`zbekiston Respublikasi xalq baxshisi" faxriy unvoni ta`sis qilingan;
- Yunus Rajabiy nomidagi O`zbek milliy musiqa san`ati institutida “Doston ijrochiligi” kafedrasi, Termiz shahrida baxshichilik maktabi, Nukus shahrida opera va baxshichilik san`atiga ixtisoslashtirilgan maktab, respublikamizdagi bolalar musiqa va san`at maktablarida folklor sinflari faoliyat ko`rsatmoqda;
- Ko`p tomlik "Qoraqalpoq folklori" to`plamlari chop etilgan;
- Hozirda 100 tomlik "O`zbek xalq ijodi yodgorliklari" majmuasi nashr etilmoqda.
Muhim rezolyusiya
Anjuman davomida baxshichilik san`ati istiqboli bilan bog`liq muhim rezolyusiya qabul qilindi. Unda:
- baxshichilik san`atining ilmiy-nazariy va amaliy asoslarini chuqur o`rganish va mustahkamlash;
- baxshichilik san`atiga oid ijodiy maktablarning o`ziga xos ijro uslublari, "ustoz–shogird" an`analarini qayta tiklash va rivojlantirish;
- elga tanilgan baxshilarning mahorat darslarini tashkil etish;
- yosh baxshilar o`z san`atlarini namoyon etish uchun keng imkoniyatlar yaratish;
- baxshichilik san`atining eng sara namunalarini to`plash;
- baxshichilik san`ati namunalarining fondini yaratish, ularning audio va video variantlarini ko`paytirish;
- baxshichilik san`atini yurtimizda va dunyoda keng targ`ib etish;
- baxshichilik san`ati yo`nalishida xalqaro hamkorlikni kuchaytirish;
- baxshichilik san`atini tadqiq etuvchi folklorshunos olimlarning o`zaro tajriba almashishni yo`lga qo`yish;
- yurtimizdagi va xorijlik folklorshunos olimlar ishtirokida turli xalqaro anjumanlar va tanlovlar tashkil etish kabi masalalar o`rin olgan.