Бахшичилик санъатини халқаро даражада ўрганишга сўнгги йилларда, айниқса, эътибор кучайган. Буни айни дамда Нукусда бўлиб ўтаётган II Бахшичилик халқаро фестивалига дунёнинг кўплаб давлатларидан ташриф буюрган меҳмонлар кайфиятидан ҳам кўряпмиз. Барча чет эллик меҳмонлар миллий қадриятларимизга ҳурмат ҳайрат ва қизиқиш билан муносабат билдиришмоқда. Мамлакатимизда бахшичиликка алоҳида бир илм, йўналиш сифатида аҳамият қаратиляпти.
Бугун, 18 сентябрь куни Нукусда Маданият вазири Озодбек Назарбеков иштирокида “Бахшичилик санъатининг жаҳон маданияти цивилизациясида тутган ўрни” мавзусида II Халқаро илмий-амалий конференцияси бўлиб ўтди, дея хабар бермоқда "Даракчи" мухбири Сардорбек Раҳмонқулов. Анжуманга ТУРКСОЙ ташеилоти вакиллари, туркий тилли давлатлардан келган олимлар, профессорлар, санъат арбоблари иштирок этиб, ўзбек бахшичилик санъатига ўз муносабатларини билдиришди.
Бахшичиликка эътибор
Конференция давомида бахшичилик санъатига сўнгги йилларда кўрсатилаётган эътибор намунаси сифатида қуйидаги амалга оширилган ишлар ҳақида маълумот берилди:
- "Алпомиш" достонининг минг йиллиги кенг нишонланган;
- Термиз шаҳрида бу улуғ бадиий обида шарафига, Самарқанд шаҳрида атоқли бахшиларимиз хотирасига бағишланган ёдгорлик мажмуалари бунёд этилган;
- "Ўзбекистон Республикаси халқ бахшиси" фахрий унвони таъсис қилинган;
- Юнус Ражабий номидаги Ўзбек миллий мусиқа санъати институтида “Достон ижрочилиги” кафедраси, Термиз шаҳрида бахшичилик мактаби, Нукус шаҳрида опера ва бахшичилик санъатига ихтисослаштирилган мактаб, республикамиздаги болалар мусиқа ва санъат мактабларида фольклор синфлари фаолият кўрсатмоқда;
- Кўп томлик "Қорақалпоқ фольклори" тўпламлари чоп этилган;
- Ҳозирда 100 томлик "Ўзбек халқ ижоди ёдгорликлари" мажмуаси нашр этилмоқда.
Муҳим резолюция
Анжуман давомида бахшичилик санъати истиқболи билан боғлиқ муҳим резолюция қабул қилинди. Унда:
- бахшичилик санъатининг илмий-назарий ва амалий асосларини чуқур ўрганиш ва мустаҳкамлаш;
- бахшичилик санъатига оид ижодий мактабларнинг ўзига хос ижро услублари, "устоз–шогирд" анъаналарини қайта тиклаш ва ривожлантириш;
- элга танилган бахшиларнинг маҳорат дарсларини ташкил этиш;
- ёш бахшилар ўз санъатларини намоён этиш учун кенг имкониятлар яратиш;
- бахшичилик санъатининг энг сара намуналарини тўплаш;
- бахшичилик санъати намуналарининг фондини яратиш, уларнинг аудио ва видео вариантларини кўпайтириш;
- бахшичилик санъатини юртимизда ва дунёда кенг тарғиб этиш;
- бахшичилик санъати йўналишида халқаро ҳамкорликни кучайтириш;
- бахшичилик санъатини тадқиқ этувчи фолклоршунос олимларнинг ўзаро тажриба алмашишни йўлга қўйиш;
- юртимиздаги ва хорижлик фольклоршунос олимлар иштирокида турли халқаро анжуманлар ва танловлар ташкил этиш каби масалалар ўрин олган.
