Toshkentdagi Adiblar xiyobonida Kinematografiya agentligi buyurtmasiga binoan «Hujjatli va xronikal filmlar kinostudiyasi» DUK tomonidan Toshkent tibbiyot akademiyasi bilan hamkorlikda suratga olingan «O`zbekning Zulfiyasiman» hujjatli filmi premerasi bo`ldi. Bu haqda O`zA ma`lum qildi.
Kinokartina O`zbekiston xalq shoiri Zulfiya hayoti va ijodiga bag`ishlangan.
Kartinada shoira hayot yo`li to`laqonli aks ettirilgan. Uning ijodiy merosi, jamoat arbobi sifatida qilgan ishlari alohida eslanilgan. Filmda arxiv kadrlaridan unumli foydalanilgan.
– Shoira Zulfiyaxonim Isroilova shaxsi har bir ayol uchun ibratli va havas qilgulikdir, – deydi aktrisa Lola Eltoeva.– Hujjatli filmda shoira obrazini gavdalantirdim. Bu menda o`zgacha faxr tuyg`usini beradi. Shu bilan birga katta mas`uliyat. Shoira hayot yo`li aks etgan badiiy filmda ham shu obrazni yaratgan edim. Ijro etgan rollarim orasida ikkala obraz alohida ajralib turadi. Rolni sevib ijro etdim. Zulfiya obrazida yashadim. Uning dardini his qildim.
Premeradan avval shoira haykali poyiga gulchambar qo`yildi va ijodidan namunalar tinglandi. Film ssenariy muallifi Shuhrat Rizaev va ijodiy jamoa kartinani suratga olish jarayonlari haqida ma`lumot berdi.
Hujjatli film rejissyori Navro`za Biynazova, operator Aziz Arziqulov, kompozitor Jamshid Izamov, rassom Sojida Hasanova, prodyuser Ahmad Unarboev. Kartinada Lola Eltoeva, Shahnoza Hojimurodova, Anisa Mansurova va boshqalar rollar ijro etgan.
