Prezident Shavkat Mirziyoev Qorako`l tumanidagi Xo`jalar mahallasida aholining yashash tarzi bilan tanishdi.
Mahalla Qorako`l tumani markazida joylashgan bo`lib, 2 ming 800 nafardan ziyod aholi yashaydi. Bu erda ko`plab savdo shoxobchalari, to`qimachilik korxonalari bor.
Davlatimiz rahbari shu mahallada yashovchi Sohib Xo`jamberdiev xonadonida mehmon bo`ldi.
Oila boshlig`i tadbirkor. Turmush o`rtog`i Diloromxon bilan ikki farzandni tarbiyalab, voyaga etkazgan. Ular mahalladagi omilkor oilalardan. Tomorqada va kichik issiqxonada poliz mahsulotlari etishtiriladi. Chorva va parranda ro`zg`orga baraka kiritadi.
Xonadon sohiblari bilan mamlakatimizdagi tinchlik, bugungi imkoniyatlar, islohotlar natijasi haqida samimiy suhbat bo`ldi.
Mahalla nuroniylari yurtimizga qut-baraka va farovonlik tilab duo qildi.
