Bugun ijtimoiy tarmoqlarda Toshkentdagi Kosmonavtlar maydonida Vladimir Janibekov haykali oldidagi granit plitalar buzib tashlanayotgani haqida xabar e`lon qilindi.
Yuqoridagi masala yuzasidan Toshkent shahar hokimligi quyidagilarni ma`lum qildi:
"Yakkasaroy tumanida joylashgan “Kosmonavtlar bog`i" bugungi zamonaviy bog` hamda sayilgohlar talablariga javob bermayotganligi, unda aholi sayr qilishi, xordiq chiqarishi uchun shart-sharoitlar etarli bo`lmaganligi sababli ushbu hududda zamonaviy qulayliklarga ega sayilgoh tashkil etish rejalashtirilgan.
Shaharsozlik talablaridan kelib chiqib, malakali mutaxasassislar tomonidan tayyorlangan loyihada bog` hududidagi yashillik va daraxtlarni saqlab qolish hamda ko`kalamzor maydonni yanada kengaytirish inobatga olingan.
Yangi bog`da, "Jemchug" va IIV oralig`idagi hududda piyodalar va velosiped yo`laklari tashkil etiladi, bolalar maydonchalari o`rnatiladi va aholi talabiga ko`ra, boshqa qulayliklar yaratiladi.
Ta`mirlash jarayonida sayilgohga yaqin yashovchi, bu erdan qatnovchi aholiga va sayr qiluvchilarga noqulayliklar bo`lishi mumkin va buning uchun uzr so`raymiz" deyiladi xabarda.
