Avval xabar berganimizdek, Italiya A seriyasining afsonaviy futbolchilari Toshkent shahriga kelishdi.
Bugun katta sport bayramidan avval futbolchilar ishtirokida matbuot anjumani tashkil etildi, deya xabar bermoqda darakchi.uz muxbiri Oybek Shukurov.
Unda, o`z davrining yorqin o`yinchilari sifatida dunyoga tanilgan O`zbek va Italiya futboli yulduzlari jurnalistlarning savollariga javob berishdi. Xususan, fransiyalik sobiq futbolchi, 1998 yilgi Jahon chempioni, 2000 yilgi Evropa chempioni, 2001 yil "Roma" safida Italiya chempioni bo`lgan Vensan Kandela Eldor Shomurodov haqidagi savolga javob berdi.
"Eldor Shomurodov uchun bu mavsum "Roma"dagi birinchisi edi, bundan tashqari Mourinyu ham shu mavsum boshida klubga kelgan. Shu bois jamoadagi taktika o`ziga xos. Shomurodov bu mavsum kam o`ynagan bo`lsa ham, qatnashgan bahslarida juda foydali harakat qildi. Uning texnikasi va jismoniy holati menga juda yoqadi. Faqat ba`zi kamchiliklarini to`g`rilasa juda kuchli o`yinchiga aylanishiga ishonaman", - dedi Vensan Kandela.
Anjumandan so`ng afsonalar yosh futbolchilarga "to`p bilan muomala qilish" bo`yicha mahorat mashqlarini namoyish etdilar.
Shunidek, anjumanda ta`kidlanishicha muxlislar stadionga bepul kiritiladi. Afsonalar o`rtasidagi futbolni esa Mirzahakim To`xtamirzaev va rossiyalik Nobel Arustamyan sharhlab borishadi.