Аввал хабар берганимиздек, Италия А сериясининг афсонавий футболчилари Тошкент шаҳрига келишди.
Бугун катта спорт байрамидан аввал футболчилар иштирокида матбуот анжумани ташкил этилди, дея хабар бермоқда darakchi.uz мухбири Ойбек Шукуров.
Унда, ўз даврининг ёрқин ўйинчилари сифатида дунёга танилган Ўзбек ва Италия футболи юлдузлари журналистларнинг саволларига жавоб беришди. Хусусан, франциялик собиқ футболчи, 1998 йилги Жаҳон чемпиони, 2000 йилги Европа чемпиони, 2001 йил "Рома" сафида Италия чемпиони бўлган Венсан Кандела Элдор Шомуродов ҳақидаги саволга жавоб берди.
"Элдор Шомуродов учун бу мавсум "Рома"даги биринчиси эди, бундан ташқари Моуринью ҳам шу мавсум бошида клубга келган. Шу боис жамоадаги тактика ўзига хос. Шомуродов бу мавсум кам ўйнаган бўлса ҳам, қатнашган баҳсларида жуда фойдали ҳаракат қилди. Унинг техникаси ва жисмоний ҳолати менга жуда ёқади. Фақат баъзи камчиликларини тўғриласа жуда кучли ўйинчига айланишига ишонаман", - деди Венсан Кандела.
Анжумандан сўнг афсоналар ёш футболчиларга "тўп билан муомала қилиш" бўйича маҳорат машқларини намойиш этдилар.
Шунидек, анжуманда таъкидланишича мухлислар стадионга бепул киритилади. Афсоналар ўртасидаги футболни эса Мирзаҳаким Тўхтамирзаев ва россиялик Нобель Арустамян шарҳлаб боришади.
