Avval xabar berganimizdek, Italiya A seriyasining afsonaviy futbolchilari Toshkent shahriga kelishdi. Kecha katta sport bayramidan avval futbolchilar ishtirokida matbuot anjumani tashkil etildi. Unda, o`z davrining yorqin o`yinchilari sifatida dunyoga tanilgan O`zbek va Italiya futboli yulduzlari jurnalistlarning savollariga javob berishdi. Xususan, bir necha yillar davomida O`zbekiston milliy terma jamoasi va Lokomotiv, Bunyodkor, Al-Shabab, Anjman liboslarida maydonga tushgan Aziz Haydarov bugungi bo`lib o`tadigan afsonalar o`rtasidagi futbolda O`zbekiston afsonalar jamoasiga kim sardor bo`lishini aytib o`tdi.
"Bir narsani aytib o`tishim shart, ko`pchilik "Bu shou bo`ladi", deb aytdi, lekin men bunga baribir boshqacharoq qarardim. Chunki milliy terma jamoani libosini kiygandan so`ng baribir siz futbol o`ynashga harakat qilasiz. O`yin qaysidir ma`noda shou bo`lgani bilan, bir-birimizga hurmat saqlagan, "oyoqni olib qochmagan" holda futbol o`ynaymiz. Jamoa sardoriga keladigan bo`lsak, biz o`sha milliy terma jamoada o`ynab yurgan paytlarimizda ham sardorlar etarli bo`lishgan, biz (men) o`shanda harakat qilganmiz, lekin sardor bo`lolmaganmiz. O`sha sardorlar o`zlari kelishib olishadi kim sardor bo`lishini, balki bu qur`a tashlash bilan belgilanar. To`g`risini aytsam bilmayman, unisiga aralashmaymiz. Biz kichkina futbolchi bo`lganmiz, buni katta narsalarni katta futbolchilarga qoldiramiz" - Aziz Haydarov.
Eslatib o`tamiz, afsonalar o`rtasidagi futbol bugun, Toshkent vaqti bilan soat 19:00 da "Paxtakor" stadionida start oladi. Muxlislar stadionga bepul kiritiladi.
