Аввал хабар берганимиздек, Италия А сериясининг афсонавий футболчилари Тошкент шаҳрига келишди. Кеча катта спорт байрамидан аввал футболчилар иштирокида матбуот анжумани ташкил этилди. Унда, ўз даврининг ёрқин ўйинчилари сифатида дунёга танилган Ўзбек ва Италия футболи юлдузлари журналистларнинг саволларига жавоб беришди. Хусусан, бир неча йиллар давомида Ўзбекистон миллий терма жамоаси ва "Локомотив", "Бунёдкор", "Ал-Шабаб", "Анжман" клублари собиқ футболчиси Азиз Ҳайдаров бугунги бўлиб ўтадиган афсоналар ўртасидаги футболда Ўзбекистон афсоналар жамоасига ким сардор бўлишини айтиб ўтди.
"Бир нарсани айтиб ўтишим шарт, кўпчилик "Бу шоу бўлади", деб айтди, лекин мен бунга барибир бошқачароқ қарардим. Чунки миллий терма жамоани либосини кийгандан сўнг барибир сиз футбол ўйнашга ҳаракат қиласиз. Ўйин қайсидир маънода шоу бўлгани билан, бир-биримизга ҳурмат сақлаган, "оёқни олиб қочмаган" ҳолда футбол ўйнаймиз. Жамоа сардорига келадиган бўлсак, биз ўша миллий терма жамоада ўйнаб юрган пайтларимизда ҳам сардорлар етарли бўлишган, биз (мен) ўшанда ҳаракат қилганмиз, лекин сардор бўлолмаганмиз. Ўша сардорлар ўзлари келишиб олишади ким сардор бўлишини, балки бу қуръа ташлаш билан белгиланар. Тўғрисини айтсам билмайман, унисига аралашмаймиз. Биз кичкина футболчи бўлганмиз, бунақа катта нарсаларни катта футболчиларга қолдирамиз" - Азиз Ҳайдаров.
Эслатиб ўтамиз, афсоналар ўртасидаги футбол бугун, Тошкент вақти билан соат 19:00 да "Пахтакор" стадионида старт олади. Мухлислар стадионга бепул киритилади.
