"Ilojsiz qolsangizgina davlat xizmatida ishlang!" Deputat, vazir, senatorlar maktab bitiruvchilariga tabrik yo`lladi

Jamiyat 25.05.2022, 14:04
"Ilojsiz qolsangizgina davlat xizmatida ishlang!" Deputat, vazir, senatorlar maktab bitiruvchilariga tabrik yo`lladi

25-may... So`nggi qo`ng`iroq. Barcha maktab bitiruvchilarining qalbida hayajon va biroz hadik. Qadrdon sinfdoshlar va mehribon ustozlar bag`ridan biroz uzilib, katta va mustaqil hayot ostonasiga qadam qo`yayotgan bitiruvchilarimizga bugun Oliy majlis senati jamoasidan tortib, vazir-u deputatlarimizgacha o`z tabriklarini yo`llashdi. "darakchi.uz" jamoasi ham respublikamizdagi barcha bitiruvchilarni mustaqil hayotga qo`yayotgan ilk qadamlari bilan samimiy qutlaydi. Sizlarni buyuk kelajak va orzularingiz ro`yobi kutayotganligiga ishonamiz. Har biringizga omad va zafarlar yor bo`lsin!

Sizlarni beg`ubor o`quvchilik davringizni ortda qoldirib, shu yillar davomida qadrdon bo`lib qolgan maktabingiz, ota-onadek g`amxo`r ustoz-u murabbiylaringiz bilan xayrlashib, ezgu orzu-niyatlar bilan hayotingizdagi yana bir mas`uliyatli bosqichga qadam qo`yayotganingiz bilan samimiy tabriklaymiz.

Ishonamizki, sizlar o`qib-o`rganishda davom etib, yaratilayotgan imkoniyatlardan unumli foydalanib, kelajakda yurtimiz taraqqiyotiga munosib hissa qo`shadigan fidoyi va vatanparvar insonlar bo`lib etishasizlar.

Barcha orzu-niyatlaringiz amalga oshsin, mustaqil hayot sari qo`ygan qadamingiz qutlug` bo`lsin!

O`zbekiston Respublikasi

Oliy Majlis Senati jamoasi

2022-yilda 390 ming nafar yoshlar maktabni bitirmoqda. Bitiruvchi yigit-qizlarimizga bir qancha tavsiyalarimizni berib o`tsam:

1. Xorijiy tillarni o`rganing. Shiddat bilan rivojlanayotgan hozirgi davrda, texnologiyalar asrida bu juda muhim ahamiyatga ega. Ayniqsa, ingliz tilini o`rganib, IELTS sertifikatini olish orqali yoshlarimiz ko`plab yutuqlarga erishishlari mumkin.

2. IT sohasi va zamonaviy kasblarni o`rganing.

3. O`z ustingizda doim ishlashdan, harakat qilishdan va kitob o`qishdan hech qachon to`xtamang! Qaysi soha bo`lmasin, uning o`z ilmi va kitobi bor. Quruvchi, dasturchi, shifokor, matematik, iqtisodchi, huquqshunos, pedagog, qishloq xo`jaligi bo`yicha mutaxassis, umuman, qaysi sohani tanlasangiz ham, shu sohaning eng zo`r mutaxassisi bo`ling.

Bir qoidani doim yodingizda tutib, shunga amal qiling: “To`xtamay yasha, to`xtagan kuning hamma narsangdan mahrum bo`lasan va erishishing mumkin bo`lganlaridan ham quruq qolasan!”

Alisher Sa`dullaev, Senator, Yoshlar ishlari agentligi direktori

Aziz bitiruvchilar, hurmatli ota-onalar!

Mana 2021-2022 o`quv yili ham ko`z ochib yumguncha o`z nihoyasiga etmoqda. Bugun jarang sochadigan "So`nggi qo`ng`iroq" sadolari barchamizni ortda qolayotgan bir yilga boqib, uni sarhisob qilishga undaydi. Yakuniga etayotgan o`quv yili so`ngida yana bir bora O`zbekiston yoshlari kelajagiga barchamiz birdek mas`ulmiz, degim keldi. Shu boisdan ham bu nav-nihollarga oilada ota-onalari, ta`lim muassasalarida ustozlari e`tiborli bo`lishi o`ta muhim ahamiyat kasb etadi.

Aziz bitiruvchilar! Sizlar maktabdan ketib, katta hayotga qadam qo`yyapsiz aminmanki, oldingizga to`g`ri va aniq maqsadlarni qo`yib olgansiz va mustaqil hayotda maktabda olgan bilimlaringiz bilan, albatta, ustozlaringizning yuzini yorug` qilib, muvaffaqiyatlarga erishasiz. Sizlarga katta hayot yo`lida barcha ustozlaringiz va o`zim nomimdan omad va zafarlar tilab qolaman! Har biringizga Vatanimiz ravnaqini yuksaklarga ko`taradigan farzand bo`lishingizni tilayman!

Baxtiyor Saidov, Xalq ta`limi vaziri

Maktab bitiruvchilariga aytmoqchi bo`lganim: imkon darajasida umringizni, tirikchilikni davlat xizmatchisi sifatida o`tkazishga olib keladigan kasb tanlashdan yiroq bo`lishga intiling, ilojsiz qolsangizgina davlat xizmatida ishlang.  

Erkingizni, ichki potensialingizni ro`yobga chiqarishga olib keladigan hayot yo`lini tanlashga kuch topa oling, bu yo`lda o`zingizni chiniqtiring.

Rasul Kusherbaev,  

Oliy Majlis Qonunchilik palatasi deputati

Bugun hayot xatarlari kuchayib bormoqda. Bir bolaga mehr bilan bilim berib, kamolga etkazib, elga qo`shib, qaddi bo`yini ko`targanimizda vaqt o`g`rilari bo`lgan – axborot xuruji, dangasalik, loqaydlik, vatanparvarlik hissining yo`qligi, beqarorlik, vaqtichog`lik, tushkunlik kabi tuzoqlar farzandlarimiz atrofida aylanmoqda. Agar vaqtida bu hatarlarni oldini olmasak u o`z domiga butun mehnatimizni tortib ketadi, kelajakni yutib yuboradi. Yoshlarni yaxshilar orasiga, niyati, maqsadi bir bo`lgan jamoa ichiga olib kirishimiz lozim. Shundagina u haqiqiy bitiruvchi sifatida taqdirini to`g`ri hal qilishni, boshlaganini bitirishni o`rganadi.

Abduqodir Toshqulov, Oliy ta`lim vaziri

Sharhlar

Ob-havo: Toshkent
Valyuta kursi
1