Afrosiyob arxeologik ob`ekti yaqinida kavlangan chuqurdan o`rta asrlarga oid sopol buyum qoldiqlari, g`isht va qabriston qoldiqlari topildi. Bu haqda Madaniy meros agentligi xabar bermoqda.
Qayd etiliishcha, dastlab fuqaro ijtimoiy tarmoqlarda A.V.Pavlenko Samarqand shahri, Shoxi-Zinda ko`chasi, Afrosiyob arxeologiya ob`ekti yaqinida er qazish ishlari olib borilganini xabar qilgan.
Ma`lum qilinishicha, ushbu murojaat yuzasidan 16 may sanasida viloyat madaniy meros boshqarmasi va arxeologiya instituti xodimlari ishtirokida o`rganish ishlari olib borilgan.
Ta`kidlab o`tilishicha, Afrosiyob arxeologik ob`ekti yaqinida obodonlashtirish bilan bog`liq inshoot qurish uchun 9x9x2,5 metr (180 metr kub) er kavlangan.
Shuningdek agentlikning o`rganish natijalariga ko`ra, shurf o`rganilganda o`rta asrlarga oid sopol buyum qoldiqlari, g`isht bo`laklari va shurfning yuqori qismida qabriston qoldiqlari aniqlangani aytiladi.
"Yuqoridagilarni inobatga olib, qazish va qurilish ishlarini olib borgan tashkilot bo`yicha aniqlik kiritgan holda, ushbu tashkilotga nisbatan choralar ko`riladi",-deyiladi xabarda.
