Афросиёб археологик объекти яқинида кавланган чуқурдан ўрта асрларга оид сопол буюм қолдиқлари, ғишт ва қабристон қолдиқлари топилди. Бу ҳақда Маданий мерос агентлиги хабар бермоқда.
Қайд этилиишча, дастлаб фуқаро ижтимоий тармоқларда Самарқанд шаҳри, Шохи-Зинда кўчаси, Афросиёб археология объекти яқинида ер қазиш ишлари олиб борилганини хабар қилган.
Маълум қилинишича, ушбу мурожаат юзасидан 16 май санасида вилоят маданий мерос бошқармаси ва археология институти ходимлари иштирокида ўрганиш ишлари олиб борилган.
Таъкидлаб ўтилишича, Афросиёб археологик объекти яқинида ободонлаштириш билан боғлиқ иншоот қуриш учун 9х9х2,5 метр (180 метр куб) ер кавланган.
Шунингдек агентликнинг ўрганиш натижаларига кўра, шурф ўрганилганда ўрта асрларга оид сопол буюм қолдиқлари, ғишт бўлаклари ва шурфнинг юқори қисмида қабристон қолдиқлари аниқлангани айтилади.
"Юқоридагиларни инобатга олиб, қазиш ва қурилиш ишларини олиб борган ташкилот бўйича аниқлик киритган ҳолда, ушбу ташкилотга нисбатан чоралар кўрилади",-дейилади хабарда.
