Rossiyada yana bir nechta yurtdoshlarimizning hujjatlari olib berildi. Bu haqda Tashqi mehnat migrasiyasi agentligi xabar qildi.
Ma`lum qilinishicha, Agentlikning Ufa shahridagi vakolatxonasiga Chelyabinsk viloyatiga mustaqil tarzda ishlash uchun borgan yurtdoshlarimiz S.A. va S.X. murojaat qilgan.
O`rganishlar davomida fuqarolarning Rossiyaga borish xarajatlarining yarmi ish beruvchi tomonidan qoplab berilgani va ular 3 oy mobaynida ishlab qarzdan qutilgani ma`lum bo`ldi. Biroq fuqarolar Vatanga qaytish istagini bildirib, ish beruvchidan hujjatlarini so`raganda qaytarib bermagan.
Vakolatxona xodimlari tomonidan ish beruvchi bilan bir necha bor muzokaralar olib borilgandan so`ng, vatandoshlarimizning hujjatlari olib berildi va Vatanga qaytarildi.
