Bugun O`zbekiston qilichbozlik federasiyasining navbatdan tashqari hisobot-saylov konferensiyasi o`tkazildi. Bu haqda O`zbekiston Milliy olimpiya qo`mitasi xabar berdi.
Unda federasiyaga yangi rahbar saylash kun tartibidagi asosiy masala bo`lgan. Yig`ilishda dastlab shu davrgacha O`zbekiston qilichbozlik federasiyasi raisi lavozimida ishlab kelgan Rustam Shoabdurahmonovning o`z xohishiga ko`ra yozgan arizasi ko`rib chiqildi va delegatlar tomonidan qabul qilindi.
Uning o`rniga “Kapitalbank” ATB Boshqaruv raisi Maqsud Abdusamatov O`zbekiston qilichbozlik federasiyasi raisi etib saylandi.
“Avvalambor, menga bildirilgan ishonch uchun minnatdorchilik bildiraman. Hozirda ushbu sport va qilichbozlik oilasining ichiga kirib, vaziyat bilan yaqindan tanishmoqdaman. O`rganishlar asosida yangi istiqbolli rejalarni shakllantiramiz. Oldimizda turgan yirik musobaqalarda sportchi va murabbiylarimizning muvaffaqiyatga erishishlari uchun barcha sharoitlarni yaratib beramiz” – dedi Maqsud Abdusamatov.
So`ng kun tartibiga muvofiq, O`zbekiston qilichbozlik federasiyasiga yangi bosh kotib saylandi. Unga ko`ra, ushbu vazifada faoliyat ko`rsatib kelgan Gulnora Saidova mazkur lavozimga qayta saylandi.
