Bugun Kinochilar uyida Kinematografiya agentligi buyurtmasiga binoan suratga olingan rejissyor Ibrohim Rasulovning "Muhabbat bahori" kinokartinasining katta taqdimoti o`tkazildi. Bu haqda Kinematografiya agentligi Axborot xizmati xabar berdi.
Filmda ikki ijodkor - O`zbekiston xalq shoiri Zulfiya va jamoat arbobi, taniqli shoir Hamid Olimjonning sof muhabbati, hayot yo`llari, ijodi, ayriliq, vafo, sadoqat tuyg`ulari haqida hikoya qilinadi. Shuningdek, ularning sof muhabbati, orzu va armonlari, Hamid Olimjon vafotidan keyin Zulfiyaxonimning ichki kechinmalari, umid va shijoatga to`la hayot yo`li o`ziga xos rakurslarda ko`rsatib berilgan.
Kinokartinada Hamid Olimjon va Zulfiyaxonimning bolalik davri, ijodiy faoliyati, asosan 1920-1944 yillar voqeliklari aks ettirilgan.
Ssenariy mualliflari Zulfiya Qurolboy qizi va Mikoyil Sulaymonov, postanovkachi rejissyor Ibrohim Rasulov, operator Tal`at Mansurov. Filmda asosiy rollarni Hamza Hasanov (Hamid Olimjon), Shahnoza Hojimurodova (Zulfiya), Shohida Ismoilova, Abdurayim Abduvahobov, Mehriddin Rahmatov va ko`plab viloyat teatrlarining mohir aktyorlari ijro etishgan.
Prezident Shavkat Mirziyoev tashabbusi bilan O`zbekistonning ikki buyuk ijodkori, etuk shaxs va jamoat arboblari haqidagi “Muhabbat bahori” filmi suratga olindi. Mana shunday kinokartinalar milliy madaniyatimiz, nafaqat o`zbek, balki butun jahon adabiy merosiga ulkan hissa qo`shadi, deya alohida ta`kidladi Kinematografiya agentligi Bosh direktori Firdavs Abduxoliqov.
— Ushbu kinofilmni suratga olayotganimda uni birinchi navbatda maktab o`quvchilari ko`rishi lozimligini bilardim va bundan juda xursandman. Bu men uchun rejissyor sifatida katta sovg`a bo`ldi, – dedi film rejissyori Ibrohim Rasulov.
– “Muhabbat bahori” filmida sevimli shoiramiz Zulfiyaxonim obrazini yaratish zimmamga juda katta mas`uliyat yukladi. Mazkur kinoasarda Zulfiyaxonimning nafaqat ijodi, balki uning insoniylik qirralari, ayollik baxti, turmush o`rtog`i, atoqli shoir Hamid Olimjonga bo`lgan vafo va sadoqati aks ettirilgan. Rejissyor Ibrohim Rasulov kasting jarayonlarida 200 ga yaqin nomzodlar orasidan meni tanlab olganlaridan xursand bo`ldim, – dedi bosh rol ijrochisi Shahnoza Hojimurodova.
“Filmda buyuk adib, taniqli shoir Hamid Olimjon siymosini gavdalantirganimdan faxrlanaman. Shuningdek, rejissyor Ibrohim Rasulov boshchiligidagi professional ijodiy guruh bilan ishlaganimdan mamnunman. Eng asosiysi, bugun 27 may mening tavallud kunimga katta premerani o`tkazilayotgani men uchun kutilmagan tuhfa bo`ldi. Tilagim, kinokartina barcha xalqimiz qalbidan o`rin olsin, deya so`zladi bosh rol ijrochisi Hamza Hasanov.
Filmning suratga olish ishlari Toshkent, Samarqand, Jizzax viloyatlari hamda Qo`qon shahrida bo`lib o`tgan.
Ma`lumot uchun, 14 may kuni Qashqadaryo viloyatidagi “Madaniyat va ma`rifat karvoni” tadbirlari doirasida o`tkazilgan “Film qahramonlaridan o`rnak olamiz” nomli umumta`lim maktab o`quvchilari o`rtasidagi insholar tanlovida “Muhabbat bahori” filmining maxsus namoyishi bo`lib o`tgan edi.
