Ayni kunlarda 23 yoshgacha bo`lgan futbolchilar o`rtasida Osiyo kubogi o`yinlari bo`lib o`tmoqda. Bugun yarim final doirasida O`zbekiston jamoasi "Yaponiya"ni 2:0 hisobda mag`lubiyatga uchratdi.
O`yinning birinchi bo`limida ikki jamoa qanchalik harakat qilishmasin darvozalarga to`p kirita olishmadi.
Ikkinchi bo`limda yoshlar o`yinni nazorat qila boshlashib, 60-daqiqaga kelib Jasurbek Jaloliddinov uchrashuvda hisobni ochdi. 89-daqiqada Husayn Norchaev farqni ikkitaga oshirdi.
Shu tariqa, o`zbekistonliklar final yo`llanmasini qo`lga kiritishdi.
Sportni rivojlantirish vazirligi xabariga ko`ra, O`zbekistonda o`tayotgan U-23 Osiyo kubogi finalida O`zbekiston Saudiya Arabiston jamosi bilan bahs olib boradi. Bellashuv 19 iyun kuni bo`lishi aytilmoqda.
Osiyo kubogi U-23 yarimfinali doirasidagi O`zbekiston – Yaponiya o`yinidan keyin uchrashuv qahramonlaridan biri Jasur Jaloliddinov fikrlari bilan o`rtoqlashdi.
"Bugun gol urib, xalqimizga bag`ishlashni xohlagandim. Chunki bugun butun O`zbekiston birlashdi, 35 million aholi bizga omad tiladi va biz qalban birga ekanimizni his qildik. Bu ikki baravar motivasiya edi. Sababi bu muxlislarsiz bahs biz uchun katta sinov edi. Shunga qaramay, barchamiz birlashib, nimalarga qodirligimizni ko`rsatdik.
Bu jamoamizning dastlabki Osiyo chempionati. Barchamizda o`zgacha his tuyg`ular. Ha, qo`rquv va hayajon bor edi, ammo biz hammasini engib o`tdik. O`ylaymanki, chempion ham bo`lamiz va bu barcha uchun fantastikadek bo`lardi", - dedi Jasur Jaloliddinov o`yindan so`ng.
Ma`lumot uchun, O`zbekistonni qo`llab-quvvatlash uchun "Bunyodkor" stadioni yonida 4 mingdan ziyod muxlis to`plandi.
Jonkuyar muxlislardan biri bo`lajak o`yin natijasini taxmin qilib ko`rgan edi.
