Sevimli

"Халқ ва жамоамиз бирлашиб нималарга қодирлигимизни кўрсатиб қўйдик" — Жасур Жалолиддинов (видео)

СПОРТ 15.06.2022, 23:42
"Халқ ва жамоамиз бирлашиб нималарга қодирлигимизни кўрсатиб қўйдик" — Жасур Жалолиддинов (видео)

Айни кунларда 23 ёшгача бўлган футболчилар ўртасида Осиё кубоги ўйинлари бўлиб ўтмоқда. Бугун ярим финал доирасида Ўзбекистон жамоаси "Япония"ни 2:0 ҳисобда мағлубиятга учратди.

Ўйиннинг биринчи бўлимида икки жамоа қанчалик ҳаракат қилишмасин дарвозаларга тўп кирита олишмади.

Иккинчи бўлимда ёшлар ўйинни назорат қила бошлашиб, 60-дақиқага келиб Жасурбек Жалолиддинов ҳисобни очди. 89-дақиқада Ҳусайн Норчаев фарқни иккитага оширди. 

Шу тариқа, ўзбекистонликлар финал йўлланмасини қўлга киритишди.

Спортни ривожлантириш вазирлиги хабарига кўра, Ўзбекистонда ўтаётган U-23 Осиё кубоги финалида Ўзбекистон Саудия Арабистон жамоаси билан баҳс олиб боради. Беллашув 19 июнь куни бўлиши айтилмоқда.

Осиё кубоги U-23 яримфинали доирасидаги Ўзбекистон – Япония ўйинидан кейин учрашув қаҳрамонларидан бири Жасур Жалолиддинов фикрлари билан ўртоқлашди.

"Бугун гол уриб, халқимизга бағишлашни хоҳлагандим. Чунки бугун бутун Ўзбекистон бирлашди, 35 миллион аҳоли бизга омад тилади ва биз қалбан бирга эканимизни ҳис қилдик. Бу икки баравар мотивация эди. Сабаби бу мухлисларсиз баҳс биз учун катта синов эди. Шунга қарамай, барчамиз бирлашиб, нималарга қодирлигимизни кўрсатдик. 

Бу жамоамизнинг дастлабки Осиё чемпионати. Барчамизда ўзгача ҳис туйғулар. Ҳа, қўрқув ва ҳаяжон бор эди, аммо биз ҳаммасини енгиб ўтдик. Ўйлайманки, чемпион ҳам бўламиз ва бу барча учун фантастикадек бўларди", - деди Жасур Жалолиддинов ўйиндан сўнг.

Маълумот учун, Ўзбекистонни қўллаб-қувватлаш учун "Бунёдкор" стадиони ёнида 4 мингдан зиёд мухлис тўпланди.

Жонкуяр мухлислардан бири бўлажак ўйин натижасини тахмин қилиб кўрган эди.

Шарҳлар