Bosh prokuratura huzuridagi Departamentning Chirchiq shahar bo`limi tomonidan Toshkent viloyati DXX va IIB xodimlari bilan hamkorlikda tezkor tadbir o`tkazildi.
Unda, fuqaro M.A. yuqori lavozimda ishlovchi tanishlari orqali fuqaro M.ni O`zbekiston davlat jismoniy tarbiya va sport universitetiga bakalavr yo`nalishiga o`qishga kiritib qo`yish evaziga 5 000 AQSh dollarini olgan vaqtida ashyoviy dalillar bilan ushlangan.
Shuningdek, Departamentning Buxoro viloyat boshqarmasi tomonidan o`tkazilgan tergovga qadar tekshiruvda, Buxoro davlat universiteti talabasi Yu.Sh. fuqaro B.ning qo`shni Qozog`iston Respublikasi universitetidagi o`qishini o`zi ta`lim olayotgan universitetning jismoniy tarbiya fakultetiga ko`chirtirib berish evaziga 22 mln so`mini firibgarlik yo`li bilan qo`lga kiritganligi aniqlanib, tekshiruv davomida o`z aybiga iqror bo`lib qaytargan 5 mln so`mi ashyoviy dalil sifatida olingan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora olish) bilan jinoyat ishlari qo`zg`atilib, tergov harakatlari o`tkazilmoqda.
