Kuni kecha ijtimoiy tarmoqlarda Toshkent shahri Chilonzor tumani hududida 99 tup daraxtning ildizi shikastlangani haqida xabarlar tarqalgan edi.
Voqeadan bir muddat o`tib ushbu vaziyatga oydinlik kiritish maqsadida Toshkent shahar hokimi voqea joyiga tashrif buyurgandi. Shuningdek, Jahongir Ortiqxo`jaev tomonidan mas`ullarga loyihadagi olti chiziqli avtomobil yo`li o`rniga to`rt chiziqli avtomobil yo`lini qoldirish, ortib qolgan joyni esa yashil hududga aylantirish topshirig`i berilgandi.
Ayni damda Sherzod Asadovning ma`lum qilishicha, Prezident Administrasiyasi rahbari Sardor Umurzakov boshchiligida bugun o`tkazilgan selektor yig`ilishida kuni kecha Toshkent shahrida ro`y bergan va aholining keskin noroziligiga sabab bo`lgan daraxtlarning nobud qilinishi masalasi qattiq tanqid ostiga olindi.
Mas`uliyatsizlikka yo`l qo`ygani uchun poytaxt hokimi va prokuroriga qattiq hayfsan berildi.
Prezident topshirig`iga asosan Toshkent shahar Chilonzor tumani hokimi Sh.Mavlonov va prokurori I.Bozorov lavozimidan ozod etildi.