O`zbekiston ShHTga raislik davrida tashkilot faoliyatini barqaror ritmda ta`minladi

Siyosat 29.09.2022, 14:19
O`zbekiston ShHTga raislik davrida tashkilot faoliyatini barqaror ritmda ta`minladi

Avval xabar berganimizdek, Poytaxtimizda Shanxay hamkorlik tashkilotining Samarqand sammiti yakunlariga bag`ishlangan xalqaro konferensiya ishi davom etmoqda.

Tadbirda so`zga chiqqan ShHT Bosh kotibi o`rinbosari Grigoriy Logvinov O`zbekistonning mazkur tashkilotga raisligini yuqori baholadi. Ta`kidlanganidek, o`n ikki oyning etti oyida O`zbekiston dunyoda ro`y berayotgan jadal o`zgarishlar, xalqaro hayotda qarama-qarshilik tendensiyalari kuchaygan sharoitda, misli ko`rilmagan silkinishlar bilan kechayotgan o`zgarishlar davrida raislik qildi.

Shunga qaramay, O`zbekiston ShHT faoliyatini barqaror ritmda ta`minladi. Shu fonda yaqinda Samarqandda bo`lib o`tgan sammit alohida ahamiyatga ega. ShHTga a`zo davlatlar rahbarlarining sammiti so`nggi uch yil ichida birinchi marta shaxsan o`tkazildi va bu zamonaviy sharoitda juda dolzarb bo`ldi. Sammitda ShHTning asosiy tamoyillari – Tashkilot faoliyatida ochiqlik va shaffoflik, uchinchi davlatlarga qarshi harakat qilmaslik, BMT Nizomiga rioya qilish yana bir bor tasdiqlandi.

Shu bilan birga, ShHT Bosh kotibi o`rinbosari ta`kidlaganidek, ushbu tashkilot rivojlanishi va faoliyatining ustuvor yo`nalishlari nafaqat kuzatuvchi, balki uzoq vaqt davomida hamkor bo`lib kelgan ko`plab mamlakatlarni qiziqtirmoqda. Ayni paytda ShHTni yanada rivojlantirish yo`lida qilinadigan ishlar ko`p.

Eslatib o`tamiz, O`zbekiston Prezidenti huzuridagi Strategik va mintaqalararo tadqiqotlar instituti tomonidan Tashqi ishlar vazirligi va Markaziy Osiyo xalqaro instituti (MOXI) bilan o`zaro hamkorlikda ShHT Mintaqaviy aksilterror tuzilmasi Ijroiya qo`mitasi ko`magida tashkil etilgan tadbirda ShHTga a`zo davlatlar, shuningdek, uzoq xorijdagi qator davlatlar, jumladan, AQSh, Belgiya, Buyuk Britaniya, Germaniya, Fransiya, Vengriya va boshqa mamlakatlarning ekspert va tahliliy doiralaridan 30 dan ortiq taniqli vakillar ishtirok etadi.

Sharhlar