Turkiy tilli davlatlar kengashi tadbirlari doirasida ko`rgazmalar tashkil etildi.
Shavkat Mirziyoevning Samarqandda «Muzeylar maydonini» tashkil etish bo`yicha ko`rsatmasiga asosan Turkiy tilli davlatlar tashkilotining ilk sammiti doirasida umumiy 5 ta ko`rgazma ekspozisiyalari tashkil etildi.
«Samarqand – do`stlik va diniy bag`rikenglik shahri»
Ekspozisiyaning maqsad va vazifalari Samarqandda yashayotgan xalqlarning zamonaviy madaniy markazlari orqali do`stlik, hamjihatlik va diniy bag`rikenglikni namoyon etishdan iboratdir. Ekspozisiya markazida «Do`stlik» ordeni namoyish etilmoqda.
Samarqandning turli xil ko`rinishlarini fotogalereyada yosh ijodkorlarning ijodiy ishlarida ko`rish mumkin.
Buyuk Ipak yo`li ko`rgazmasi
Innovasion texnologiyalarga asoslangan «Buyuk ipak yo`li» nomli ekspozisiya Xalqimizning boy o`tmishi, madaniyati va jahon mamlakatlari bilan o`zaro hamkorlik aloqalarining tarixiga bag`ishlangan. Ekspozisiyada O`zbekistonning qadimiy shaharlari bilan ipakning asl vatani bo`lgan Xitoy o`rtasidagi ijtimoiy-iqtisodiy munosabatlarga asosiy e`tibor qaratilgan. Shuningdek, bronza davriga oid kulolchilik va bronza buyumlari, bronza oyna namunalari namoyish qilingan. O`zbekiston janubidagi Sopollitepa va Jarqo`ton aholi punktlarida topilgan miloddan avvalgi 17 - 16 - asrlarga oid bronza ashyolari esa O`zbekiston hududida bronzadan yasalgan buyumlarning keng assortimenti va ilk shahar madaniyati rivojlanganligidan dalolat beradi.
O`zbekiston ranglari (bo`yoqlari)
Ko`rgazmadan Qoraqalpog`iston Respublikasi Davlat san`at muzeyi (Nukus) kolleksiyasi rasmlari o`rin olgan. Unda 14 nafar rassomning O`zbekistonga bag`ishlangan ijodiy asarlari namoyish etiladi. Ko`rgazmada O`zbekiston tasviriy san`atining shakllanish davri bo`lmish XX asrda turli uslublarda ijod qiluvchi rassomlarning birlashish nuqtasi ifodalangan.
Namoyishda ko`rish mumkin bo`lgan o`zbek tasviriy san`atining yana bir muhim mavzusi «Katta suv asari»
Ko`rgazmada 90 dan ortiq kartinalar namoyish etiladi. Undan XX asr O`zbekiston tasviriy san`atining barcha jabhalari o`rin olgan.
Vaqt saroblari
Ushbu ko`rgazma insoniyat taraqqiyot bosqichlarini o`zida aks ettirgan. Unda miloddan avvalgi ikkinchi asrda ishlangan qo`l mehnati ashyolaridan boshlab, milodiy yigirmanchi asrdan yasalgan hunarmandchilik namunalari namoyish etilmoqda.
Turkiy xalqlar milliy liboslari ko`rgazmasi
Turizm va madaniy meros vazirligi tashabbusi bilan Turkiy tilli davlatlar tashkilotining navbatdagi sammiti doirasida milliy liboslar ham namoyish etilmoqda. Ko`rgazmada O`zbekiston, Turkiya, Qozog`iston, Vengriya, Qirg`iziston, Ozarbayjon, Turkmaniston mamlakatlarining milliy liboslarining o`ziga xosligi, milliy madaniyati, qadriyatlarini aks ettiruvchi kartinalar namoyish etilmoqda. Bu rasmlar o`zbekistonlik yosh rassomlar tomonidan chizilgan. Samarkand City majmujasidagi Kongress hol binosida tashkil etilgan ko`rgazmada 20 dan ortiq asarlar namoyish etilmoqda.
Dilbar Abdunabieava
